"Alemanian 747 egün preso egon ondoan, nola ezkapi nizan ?" Pierre Cocosteguy Gamerararen historia aipatzen düan libürüa plazaratü berri dü Xiberoko Ikerzaleak alkarteak. Libürüan kontatürik da, bigerren gerla mundialaren denboran, nola bi lagünekin ezkapi zen Alemaniatik eta Frantzia zeiharkatü ondoko, etxeala berriz ützüli zen. Pierre Cocosteguy berak, ützüli bezain sarri idatzi züan kontakizün hau, libürüan erakurten ahal dena. Denis Cassard Ikerzaleak alkarteko kideak eraman düan ikerlanaren anotazioneek aldiz, egiaztatzen düe kontakizüna. Libürüa, Mauleko Xibero Bio saltegian eta Atharratzeko Lilou Prentsa saltegian eros daiteke.

Entzün Jean Cocosteguy bere semea : 

Maulen 6 eüskarazko libürü xiberotarrez presentatürik izan dira. IKAS alkarteak dütü libürü horik argitaratü. Destorbüz, matematika edo edozoin ikasgeientako libürüak dira Ikastola edo elebidün eskolentako eta üsüan ikasgei horik ez dira xiberotarrez ützülirik. Hots, gertakari bat da xiberotarrez ipuin txipiak ageraztea ! Berrezitarzünetan, libürüen gibelean diska bat bada Ttittika Recalten botzarekin, xiberotarrez erakurririk. Sei ipuinen artean haütüa badüzüe : Beldartto lagünkaria, har txipia baratzean gainti, elür xuri ,bilürre karakoil edo olentzero. Libürüxka horik, Mauleko Libürütegian edo Xibero Bio saltegian edirenen dütüzüe.

Entzün Maddi Etxekopar Ikas Xiberoa alkarteko animazailea : 

Topo Pass.com web güneak, züen hitzordüak Eüskal-Herri osoko agenda batean agerazteko posibilitatea emaiten deizüe . Düala urte zonbait, Lapurdiko gazte multxo batek "Interneteko Agenda" bat osatzea xedearekin abiatü ziren. Agenda hori ekintza sortzailek erabilten düe, horrez gain antolazaleen üngürüko xehetarzünak gehitzen ahal dira eta beste abantail franko. Horietan "Topo Pass Karta" bada, horrekin prezio apaltzeak esküratzen ahal dütüzüe web günean agertzen diren ekitaldi edo partaide ezberdinekin. Karta Maulen Xibero bio eta AZIAren egoitzan atzamanen düzüe 5€tan.

« Hitza Hitz– Paroles de basques » Gaby Etxebarnek bere azken libürüa presentatü dü abentü hatsarrean Maulen. Gaby Etxebarne sortzez Aldudarra da, orai Toulousan bizi da. Bere bizi güzia borrokan eraman dü jenteen lagüntzeko misionista bezala. Argentinan eta Laos-en egon da eta bere denborako ixtoria kontatzen dü. « Paroles d’amatxi », « Paroles de bergers », « D’ici et d’ailleurs » libürüak idatzi ondoan, bere bostgerren libürüa plazaratzen dü. Libüru berri hontan, düala 100 urte, Eüskal-Herriko jenteen bizia kontatzen dü. Ixtoria hanitx ere agertzen dira, Xiberotik edo  Baxe-Nafarroatik jeentek kontatürik eta ümore handian kontatürik. « Hitza Hitz– Paroles de basques » libürüa Mauleko eta Atharratzeko prentsa saltegietan eta Xibero Bio saltegian edirenen düzüe.

Entzün Gaby Etxebarne idazlea :