Xede hanitxekin aitzinatzen jarraikitzen dü Xiberoko Botingoak . Bere biltzar nausia igaran neskenegünean zen. Ahüzkiko hurarekin eginik datekean Whiskyarentako partaidetza urte hau ürrentü gabe izenpetü gei düe. Bestalde, Iratiko oihanari lotürik diren beste hiru sindikatekin (Garazi-Baigorri, Zaraitzu eta Aezkoarekin) ezagügarritza edo labelisazione bat esküratü gei düe. Horrez gain, Iratiko oihana güne mikologiko bat bilakarazi nahi düe, non onddoen eretzeko jakintza partekatüko den. Düala 5 urte Iratiko etxoletan abiatü ziren lanen ürrentzeko, 3 logüneren egitea baizik ez da eskaz. Haatik, Botingoarentako berri txar bakarra da langile nausia den David Tourreuilek bere lana ütziko düala. Bazen 15 urte David Tourreuil lan hortan ari zela. Biltzar nausiaren bildüma Jacques Barreix botingoabürüarekilan :

Berririk gabe dira Maule-Lextarreko kabale ehogian abereak bortizki hiltzen filmatürik izan ziren hiru gazteak. Oritzen gira 2016ko martxoko gertakari hurak, L214 alkarteak filmatü zütüala. Oihartzün handia üken züan bideoak, eta proküradoreak aitzin-ikerka bat abiarazi züan hiru langileen kontre. Antoine Tugas abokatak jakinarazi dü, bideo-irüdi horik izigarrikoak izanik ere, egitate horien gibelean diren lan baldintzak ez dira ahatze behar. Hala, langile eskasa, zalhe lan egin beharra, habororen ekoizteko, eta traza txarreko tresnak ere salatü dütü abokatak. Ürrentzeko, hiru langileek ere auziala salatze bat egin düe, berak jakinean izan gabe filmatürik izan beitira. Antoine Tugas abokata:

"Xiberoak bizi nahi dü" izeneko lagüntalde berriak egünaldi berezi bat antolatzen dü arramaiatzaren 24 hontan, Atharratzen, "Hura 2017ko epean" geiaz gogozkatzeko. Lagüntalde honek herri mugimentüaren berpizteko helbürüa dü, hots herritarrek herriaren antolakuntza berengain hartzea, edota instituzioneen haütüak baldintzatzea. Neskenegün hontan, arren, huraren küdeantza date eztabaidagei. Ezi, 2017 ondarrean huraren küdeantza publiko ala pribatu bilakatzeko deliberoa hartürik date, ondoko 10 urterentako. Gei hortaz "Water makes money" izeneko dokümental bat ikusgai date eta ondotik eztabadakatüko da haütetsi elibatekila. Merkatü libre bat badateke ere goizan. Horik oro neskenegün hontan, Atharratzeko Prefosta alkartean. Niko Guiresse :

Atharratzeko kontseilüan aitzinkontüak eta iheslariez gain, erabaki düe “I-ener" energia kooperatibako xedearen süstatzea. Xede hori delarik, energia sailean ahal bezain beste beregain bilakatzea. Hortarako, eki-panelak jarri gei dütüe, Atarratzen. Bestalde, Barkoxeko Ühartea etxaltearen süstatzeko mozione bat izenpetü düe zinegotxiek. Eüskal Hirigüne Alkargoak eüskararen esküdüntza har dezan ere bozkatü düe, bai eta Linky kontagailüaren zabaltzearen kontre joaiteko ere. Jüntaren llabürpena Arnaud Villeneuve Atarratzeko aüzapezarekin: