Urte oroz bezala, Xiberoko Botzako langile eta lagüntzaileek etxez-etxe kanpaina eginen dügü üda hontan ere. Iragan neskenegünean hasirik, herrietan gainti kurritüko gira züen lagüntzaren galtatzeko. Irrati honen ibilmoldean ezinbestekoa da üda oroz biltzen dügün sos zione hori. Gure lagüntzeko prest denak deit beza irrati hontarat (05 59 28 29 87). Besteak, züen etxetik iraganen girelarik ikusiko zütüegü, eta gure programazioaz ohar egin nahi badüzüe ez düda. Jakin ezazüe ere bestalde lagüntzak xüxenka igorten ahal dütützüela helbide hontara : 18, Victor Hugo karrika, 64130 Maule.
Eskerrik hanitx aitzinetik.
Entzün Allande Errezarret, gure administrazio bülegoko kidea :

Xafaria antolatü züan iragan astebürüan Azia alkarteak bizikletaz edo pirripitaz. Lekü gorenetara joaitez, begibistaz Xiberoa nola egitüratürik den ikustea zen helbürüa. Horren arabera ondotik, lanak aitzinatü nahi lütüzke gazteen alkarteak. Ideia Baxenafarroatik üken züen, hanko gazteak ber gisako hitzordü batetan ohartü beitziren gazteek arrenkürak zütüela etxebizitzen atzamaiteko. Hartarik partitü ziren nafartarrak apartamentü zonbaiten zaharberritzeko.
Xiberotar gazte horiekin egon zen Ttk, entzün lehen diagnostika :

SNRL edo estatü frantseseko irrati libreen sareak biltzar nagusia egin züan iragan astean Nantesen (Bretañan). Lole han zen Xiberoko Botza, Eüskal Irratietako beste irratiak bezala sare horren partaide beita. Bada bizpahiru urte sindikata horren baitan irrati nümerikoaren üngürüko eztabaidak badirela, alde batetik goiz ala berant jauzia egin beharko beita, eta gobernüak irrati nümerikoarentako norma bat haütatü beitü, bena oroen gustükoa ez dena. Enpresa handi zonbaiten nahiküntea irrati nümerikoa sare telefonikoen bidez hedatzea litzateke, eta segürrenik pagaraztez, bena SNRL sindikatak antena bidez heda dadin galtatzen dü, irratia dohainik izan dadin geroan ere.
Entzün xehetarzünak Lolekin :

1981an hasi zen Xiberoan erretor izaten. Lehenik Larrainen bi urte iragan zütüan, ondotik Altzairat joan zen eta han egon da geroztik. Bena berriki jakin dügü erretorgoako erretreta hartüko düala üda hontan, üztailaren 11an azken meza eman ondoan. Hainbeste urteko egonaldiaz elestatü da Junes Casenave Ttk Recaltekin.
Nahiz orano ez den bere ordaria izendatürik izan, galtegin deiogü bere ustez eüskaldüna izanen denez. Entzün Junes Casenave :