Ostirale hontan Mauleko Zinka ostatüan, ülüntzeko 8.30tan, "Le silence des nanos" filma ikustea eta ondotik bere egilearekin eztabaidatzea proposatürik zaizüe. Nanoteknologia zer den bi hitzez argitzeko, atoma eta molekülen heineko teknologia dügü. Zientzia aitzinatzen den ber, pentsalari zonbaitek eztabaidak plazaratzen dütüe, zeren eta Heidegger filosofoak zion bezala "zientziak ez dü pentsatzen". Bide hortarik joan da Julien Colin, filmaren egilea. Bereziki filosofoak mintzaraztez, nanoteknologiaren garapenak bazter ützi düan pentsaketa builarazi nahi lüke. Asteazken gaü hontan Baionan, ostegünean Pauen eta Ostiralean (abentüaren 11) Maulen erran bezala, filma erakutsi eta eztabaida animatüko dü Julien Colinek.
Entzün Julien Colin, filmaren egilea :

Klun edo pailazo bat, sonüegile bat eta dantzari bat alkartü dira Har eman ikusgarri poetikoa proposatzeko. Biziaren gorabeherak eramanik, norat bürüz ari den ikusteko denborarik ez düanaren poetika lantzen dü. Dantzak zerbait ekarten dü, müsikak ere, klunak ere eta poesiak ere... Ez da sail bakar baten etiketarekin aurkeztürik izan. Eta arte ezberdinen kürütxatze horrekin, pertsonaia bat bere osotarzünean erakutsi nahi deigüe hiru arizaleek : Jean-Christian Irigoien, Mathieu Mendizabal eta Pierre "Vivi" Vissler. Abentüaren 12an neskenegünean ikusgei dateke Maule Baitha zinema gelan, gaüko 9etan. Sartzea 12 eurotan izanen da, eta apaltzeekin 7 euro eta 5 euroetan (dohainik 7 urtez pekoentako). Hebentik kolektiboaren antzezlana da.
Entzün aurkezpen labürra Pierre "Vivi" Vissleren ahotik :

Uhartetik (Nafarroa) Maulerat jin dira Gomi eta Lander Flakutt beren talde berriaren aurkeztera. Uharteko Txalaparta Taldea behin beno haboro ikusi ahal izan dügü Xiberoan, eta iragan urteko Maiatza Tauletan antzerki festibalean, Flakutt bilakatüko zenaren lehen aurkezpena egin züen. Geroztik lan egin düe, eta lanak grabatü. Txalaparta eta müsika elektronikoaren arteko nahasketak eginik, lehen diska salgei ezarri düe, Mauleko Herri Ekoizpen saltegian besteak beste.
Entzün diskaren aurkezpena :

Iragan neskenegünean aurkeztü züan astobelarrak bere azken argitalpena Mauleko Herri Ekoizpen saltegian. Alphonse Daudet idazle ezagünaren testu labürra dü argitaratü, eüskaraz eta frantsesez. Ber libürüan, Jean-Claude Touzeilen olerkia ere irakurten ahal da, hori ere eüskaraz eta frantsesez. Ützülpen lanetan ari izan den Piarres Erdozaintzi Etxart alkarrizketatü dü Dominika Rekalt (TTK) gure lankideak.
Entzün liburüaren aurkezpena :