Omenaldi xüme bat datekeala erraiten düe Agosti Xahoren Adiskideak alkarteko kideek. Iragan urtean izan zen lehena, eta aurten ere, Baionako hilobian omentüko düe Xiberotarra.
Bere bizi labürran (1811-1858) lan hanitx egin zütüan xiberotarrak. Idazle, kasetalari, eüskararen eta eüskal kültüraren süstazale, ezkertiar eta errepüblikanoa, pentsalaria... eta besterik ere izan zen. Bestalde, literatüran ere ari izan zen eta bere libürü bat baizik ez balitz aipatü behar, Voyage en Navarre zatekeala erran deikü düdarik gabe Allande Sokarros, Agosti Xahoren Adiskideak alkarteko kideak.
Bere biziaz haboro jakiten ahalko da Agosti Xahoren omenaldian, Baionan. Aurten, mintzaldi bat proposatzen düe ostiralean, ülüntzeko 6etan, Fermin Arkotxa delarik elhestatüko.
Omenaldia berriz, neskenegünean, goizanko 11etan dateke Baionan, San Leon hilerrian.
Entzün Allande Sokarros :

Pastorala ez dela galtzeko püntüan, lotsarik gabe erraiten ahal dügün zerbait da, 2015. urtea artino izanen beitira gütienez. Harrigarri udüri badü ere, kostüma bilhakatzen ari da hiru, lau edo bost urte lehenago pastorala baten iragartea... üxü jakin gabe ere zoin gei edo pertsonaren bizi jorratüko düen. Egün hauetan Zalgize-Iruri herriak dü jakinarazi 2015eko pastorala eginen züala.
Hona pastoralak eginen dütüen herrien zerrenda :

2010 : Barkoxe / Xahakoa pastorala (ikus heben klikatzez gure artikülüa)
2011 : Larraiñe
2012 : Arrokiaga
2013 : Sohüta
2014 : Garindaine
2015 : Zalgize-Iruri

Eta üdüri lüke orano badirela nahiantak, hala nola Maule, Pagola eta Urdiñarbe... Nor besterik ?

1884an Zibozen sortü zen Madeleine Jauregiberri eta izenbürüak dion bezala, ürrietaren 20an zentü zen 1977an. Lur hiztegi entziklopedikoan atzaman artikülüa deiziegü heben proposatzen, oritaraztez Eskiulak pastorala egin züala haren omenez 2000 gerren urtean :

Xiberotar idazlea eta eüskaltzalea. Pauen egin zütüan goi mailako ikasketak. Gure Herria, Herria, Basque Eclair eta Sud-Ouest agerkarietan argitaratü zütüan eüskararen aldeko idazkiak. Aitzina izeneko eüskaltzale taldekoa izan zen gerra aitzineko garaian. Ipar Eüskal Herriko haurrentako eüskara irakasbide bat egin züan. Mirakuilu bat, Zikoitza eta Euskaldun jauntziak antzezlanak ere idatzi zütüan. Eüskaltzain urgazale izan zen, eta (gük gehitürik) ohorezko eüskaltzain izendatürik izan zen 1975an.

Entzün Eskiulako pastoraleko kantorea :