Arrokiagako « Eskanda » etxaltearen erosteko, Lurzaindia alkarteak sos-biltze kanpaina bat abiarazten dü, urte ondarreko, 72.000 euroren biltzeko xedearekin. Orotara, 26 hektarea lür, ahünztegia eta gaztantegiaren erostearekin, Anne Lavisen lana salbatüko da. 2006tik etxalte hortan delarik, 50 ahüntz hazten dütü eta 13.000 esne pintarekin gaznak eta eznakiak ekoizten dütü. Walloniatik Eüskal Herriala jin ondoan, badü 10 urte etxalte hortan lan egiten düala. Oraidanik parteak erosten ahal dira 20 eurotik goiti, xekak igortez helbide hontara: Lurzaindia Haize berri 64120 Izura edo ere internetez. Kanpaina honen süstengatzeko ,animazioneak ere izanen dira, lehen hitzordüa azaroaren 11an datekealarik, Ozazen. Egün berezi bat antolatürik da bazkari, filma eta kontzertü batekin. Lurzaindiako Marie Claire Leurgorri ::

Jadanik hamabigerren ezne-biltze sasua abiatüko da laster Muskildiko Azkorria laborari gaznakagian. Artean, gazna erosleen eta süstengazaleen eskertzeko gisan, feira bat antolatzen da neskenegün hontan, ürrietaren 28an. Kalitatezko gazna hau kartieleko jenteer ere proposatü nahi düe eta hortarako urtean berritan gaznak prezio apaletan saltzen dütüe Bazkoz eta, arre,n Domesantorez. “Lür bat, talde bat, gazna bat” mezüarekin, 17 laborariren artean altxatü zen gaznakagia eta 10 urteren bürüan bere leküa egin dü eta segürtatzen ari da. Güti gora behera, 460.000 ezne butilla biltzen dütüe sasuan eta gazna haboroxeenak saltzen dira Akitania esküaldetik Bordelera artino, bai eta Tolosako salgüne handietan ere. Salmentaren %5a, aldiz, Hego Eüskal Herrian egiten da. Egünko egünean, 16 laborari partxuer dira eta 7 lanpostü bada gaznakagian. Jean Claude Barreix :

Saretegiak, Napale eta ürzo solas badate ostirale arrats hontan Urdiñarben. Ülüntzeko seietan hasiko da ürzoaren mündüaz mintzo datekean gaüaldia. Napaleko saretegietako argazki andana bat ikusgei dirate ostatüaren ondoko gelan, Mixel Xilopek aipatüko düalarik teknika honen hiztegia, Xarles Videgain Euskalzainak bere ekarpena ere eginen düalarik. Txorien zaintzaleen alkarteko Jean Paul Urcunek txorien harakonakatze edo migrazioneaz mintzatüko da, eta azkenik, nahi düanak ürzo edo baratzeki jaten ahal düke herriko ostatüan; hortarako, haatik, izenak eman behar dira 06 73 24 20 81 telefona zonbakian. Ürzoen üngürüko gaüaldia, ostirale arrats hontan 6etarik goiti, Urdiñarbeko Bil Xokoan. Leonie Bedaxagar eta Mixel Xilope:

Akitanian diren 36.000 etxaltetarik 13.900 dira etxalte ttipien sailkarauetan edo kriterioetan sartzen (%40a). Etxalte ttipietzaz arrenküratze hori, Xiberotik abiatü zen 2009an. Urte hartan gaitzaldi bortitza jasan zen laborantxan, eta bereziki etxalte ttipietan. Geroztik, arraheinki bildü dira beren arrenküren aipatzeko, gogoeta talde batetan. Frantziako heinean ere, Confédération Paysanne sindikatarekin lantü da etxalte ttipiaren definizione edo deskribapen bat: güti gora behera 30 bat hektaraz petik bai eta 50.000 euroko PAC lagüntza urtean jente batentako. Orai ahültzen ari beita taldea, ELB sindikataren lagüntzarekin honen arrabuiltarazteko gogoa bada, eta lehen bilküra bat egin ondotik Xiberoan, ondoko hitzordüak finkatü dira: ürrietaren 26an Hazparnen Xuriatea ostatüan eta azaroaren 2an Lasan. Erramun Etxekopar :