Xiberoko Herri Alkargoaren azken bilküran, 2011ko büdjeta eta garapen ekonomikoa izan dira aipagei nausiak. 6 milu euro, funkzionamentüarentako, miliu bat eta 400 mila euro inbeztizamentüarentako ! Hona zenbaki nausiak zoin diren. Funkzionamentüan, Atarratze eta Mauleko haurzaintegietan kontüa emendatzen da ikusiz haurzionea ; aldiz ondarkinetan lehentze bardintzen da, honek erakasten dü jenteek ontsa egiten düela ondarkinen bereixtea. Inbeztizamentü sailan, Mauleko pizinaren berritzea izanen da xede nausia, 5 miliu euro ezarriko beita. Bestalde, ekonomiaren indartzeko, Herri Alkargoak, ofiziale eta indüstria güneak nahi dütü plantan ezarri, hortarako ZAD (zone d’aménagement différée) izena düan eremüak saihestü nahi dütü. Ondotik, Alkargoak legez, lehentarzüna lüke lürren erosteko laborarier. Xiberoan lau eremü begistatü dütü alkargoak, haboroxenak Maulen ondoan. Laborari eta herriekin konzertazioan eraman nahi da xedea, laboraria ez dadin lurrik gabe egon, trükaketa bat proposatüko da.

Entzün Mixel Etxebest Xiberoa Herri Alkargoako haütetsia :

Baseri mündüan, zerbütxü püblikoen begiratzeko, Jean-Pelle Iriartek bere proposamenak ezagütarazi dütü astearte goizan Atarratzen. Jean-Pelle Iriartek, departamentü mailan Force 64 taldeak egiten dütüan proposamenekin bat egiten dü. Zerbütxü püblikoen etxekitzearen üngürüko eztabada, Kontseilü Orokorreala ekartea proposatzen dü, hitzarmen baten sortzeko. Hitzarmen honek, zerbütxü püblikoen eskentzaren kanbiatzeko, leküko haütetsüekin konzertazioan egin beharko dela erran dezake. Herritarrer zor zaien zerbütxü güttiena ez bada segürtatürik, Kontseilü Orokorrak « Moratoire » edo lüzamen bat eskatzen ahal lüke. Ber ildoan, Xiberoa Herri Alkargoak düan osagarri etxe baten eraikitzeko xedea Atarratzen, Jean-Pelle Iriartek aitzina eramaiteko nahiküntea erakutsi dü. Azkenean, bere ordaria ere ezagützera emanik izan da, Maddalen Quihillalt Ligiarra da.

Entzün Jean-Pelle Iriart Atarratzeko bozketan haütagei dena :

Hartz berri baten sartzearen kontre, 6800 petizione ekarri dütüe ostiral eguerdi hontan Paueko prefekturala, Pirene güzietako FNSEA laborari sindikatako ordezkariek, lau departamendüetako laborantza ganberetako lehendakariek, elkarte ezbardinetako lehendakariek eta Jean Lassalle depütatüak.
Delegazionea oren erdi batez errezibitürik izan da, prefektüraren aintzinean 300 bat artzain-laborari gelditü direlarik. Jean Michel Anxolabeherek erran deikünaz, egin eta ekarri dütüen oharrak, prefetak eginen düan txostenean gehitüko dira. Gehitü dü ere, Frantses gobernüaren deliberoa ez bada nahi düen zentzüan joaiten, beste ekintza zonbait antolatüko dütüela ondoko hilabeteetan eta mobilizatürik egonen direla.

Entzün Jean Michel Anxolabehere, departamentüko Laborantza Ganbarako lehendakaria :

Atarratzeko kantonamentüan seigerren haütagei bat ! Urtarilaren 24an, Eüskal Herria Bai-en haütageia eta koalizio abertzalearen ildo nausiak plazaratürik izan dira. Gillen Iriart dügü haütagei gazteena 28 urteekin. Ariège eskualdean sortü eta bizi izan da ikasketak ürrentü artino. Xiberoalat jin da bizitzera bere erroak Larraiñen beitütü, eüskara ikasi eta segidan parte hartü dü mugimentü sozial, politiko eta kültüraletan. Ildo hortarik bere haütageitzak koherentzia dü EH Bai-en kanpainarekin eta idei horien zaintzeko prest agertzen da. Ardatz nausiak dira : lürralde erreformaren kari, Iparraldeko kuadro instituzional baten lortzea ( Bateraren emaitzak baliatüz); eüskararen süstatzea galtzen ari beita; laborantxa azkartzea eta herrian bizi, erran nahi beita Xiberoan lan, bizi eta zerbütxü pübliko baten ükeitea. Ürrentzeko, haütageitza honen berezitarzüna da bigerren haütageia Aurore Martin Mauletarra dela. Abentü ürrentzeaz geroztik gorderik da, Espainiaratzeko euro agindu baten mahatsü pean. Gillen Iriartek baieztatü deikü lehen ikusmolde batetan haütagintza hau sinbolikoa dela. Bena Aurore Martinen nahiküntea da, orai artino eraman düan lan politikoaren jarraikitzea bena baldintza gogoragoetan.

Entzün Gillen Iriart Atarratzeko EH Bai alderdiko haütageia :