Aurtenko 22 gerren Xiru festibalak hiru egün iraün dü Gotaine-Irabarnen. Ostiralearekin hasi da Altzürüküko elizan kantaldi-müsikaldi gaüaldi batekin. Gaüaldi hunkigarria izan da Philippe Ezkürra, Beñat Achiary eta Georgiar kantarier esker. Neskenegün gaüan aldiz, "Txakoste" Gaüaldian memento azkarrak ere izan dira sorkuntza, trükatze sailan aktür eta kültür kürütxatze arte hortan. Eta igandean Gotaineko plazan, "No Future"  Xiberoko klunaren ikusgarria ikusi da, Pierre Visleer sorkuntza bat. Ondotik, igande arrestiritan Gotaineko plazan, jenteak saldoan bibilkatü dira, "Maskar" ikusgarria soegiteko. Ander Lipus, Markiñako Abarka taldeak eta Pariseko Par-Alleles Hip Hop taldeak maskarada gisako ikusgarria eskentü düe. Muda berriko maskarada hori arrakasta ederrak bildü dü eta Xiru festibala giro hoberenean ürrentü da soinü eta dantzarekin.

Entzün Michel Etxekopar Xiru festibaleko antolazalea :

Bi ta bi "Txakostea" sortürik, Xiru 22 abiatzeko prest da Gotainen-Irabarnen. Abotia alkarteak lantzen düan Xiru festibala, Xiberoko festibalen balada zabaltüko dü 3 egünez. Ostirale gaüan, Kantaldi-müsikaldia izanen da Altzürüküko elizan Philippe Ezkürra, Beñat Achiaryrekin eta Georgiatik jinik Urmuli taldea. Neskenegünarekin badate zer ikus : goizan jei zonbait Mauleko plazan arrestiritan Irabarnen zizelkadüra estrenatzea eta gaüan "Txakoste" gaüaldia Gotainen. Igandean egün osoan jei ezbardinak Gotainen. Egitaraoa osoa eta xehetarzün güziak hebentik.wifeo.com helbidean esküratzen ahal dütüzüe.

Entzün Mixel Etxekopar Xiru festibaleko antolazalea :

« Signes et sillons» izeneko erakuska proposatzen dü Thomas le Cœur artistak. Apirila ürrentzeala artino ikusgei da Mauleko Ondarrearen Etxean. Apirilaren 15 hontan estrenatze ofiziala eginen da Mauleko haütetsüekin. Arte lan hau ezagützeko parada ükenen düzüe eta galto güziak pausatzen ahalko dütüzüe.

Entzün Thomas Le Coeur zizelkari-artista :

Lapurdi eta Baxenafarroatik landa, Haur Kantu Txapelketako Xiberoko erdi-finala jokatü da apirilaren 10ean Maulen. Finalan parte hartüko düen ordezkariak haütatürik izan dira ttippiak eta gaztetxoak mailan. Gaztetxoetan bakarkan, lehen saria Maialen Etxebestek erabazi dü "Txorien balada" kantorearekin eta taldean Garindaineko neskatilek erabazi düe "Gero bi hitzez" ahaidearekin. Ttippietan bederazkan, Maider Jaury Arbailla eskolako ikasle gaztea "Oihanean" kantorearekin, biazkan, Phetti Galant eta Pette Ligueix Sohütako ikastolako ikasleak "Ene izar maitea" kantorearekin, taldekan, Sohütako Ikastolako ikasleak "Bedatsean" kantorearekin eta azkenik püblikoaren saria eraman düan Altzaiko eskolako taldeak "Etxeki azkarki" kantorearekin izan dira erabazleak. Haur Kantu Txapelketaren finalan parte hartüko düe arramaiatzaren 11an Hazparneko Mendeala gelan.

Entzün Ihitz Iriart epai mahainean zen epailea :