Terre Verte alkartea prentsaren aitzinean agertü da aste hontan Donapaleün. Sarrikotapeko alkarteak ahal düan güzia egiten dü Bil ta Garbi sindikatak haütatü bidea okerra dela egiaztatzeko. Aipatü gabe izan ziren bilküra eta manifestaldi ezberdinak, 2008ko herrietako haüteskundeetan,Terre Verte alkarteko kide den Laurent Etcheberry aüzapez izendatürik izan zen.
Azken denboretan, Sarrikotapeko alkarteak lan berezia egin dü ondarkinen berexketaz. 20 familia haütatü dütüe, denak bolondresak, eta ondarkinak berexi eta pezatzea galtegiten zeie. Erran behar da lau familientako pezü izan dela, eta esperientzia ez jarraikitzea deliberatü düela. Haatik Terre Vertek esperientzia hau eraman hiru hilabeteen bilan baikorra egin dü aste hontan. Dio berexketa "behar bezala" egiten delarik, azkenean gure ondarkinen %11 baizik ez dela zikinontzian atzamaiten. Esperientzia honen beste alde baikorra jenteen ohidüren kanbiatzea izan dela azpimarratü düe.
Entzün Laurent Etcheberry, Sarrikotapeko aüzapeza :

Apetab 64 alkarteak Tarijako (Bolivia) haurren süstengüz kantaldi bat antolatzen dü neskenegün hontan Sohütako elizan gaüko 9etan. Xiberoko Botzean düala urte pare bat Mathieu Jaragoyhen Berrogaineko gazteak hego Ameriketan egin bidaje bat aipatü zeikün. Herri bat beno haboro zeharkatü zütüan urte batez, horien artean Bolivia. Han, leküko alkarte batetan ari izan zen lanean, karrikan bizi diren haurren eskolatzeko, eta inganioen proposatzeko.
Bidajetik ützüli zelarik, bere familia eta adixkideek Apetab 64 (Association pour les enfants de Tarija en Bolivie) alkartea sortü züen. Tarijako alkarteari sos igorteko, ekitaldi ezberdinak antolatü dütüe orai artino (kantaldi, aihari, olerki libürü bat, zankobalu lehiaketa bat...). Ondokoa, kantaldi bat dateke beraz Sohütako elizan. Ikusgei eta entzüngei dirateke Jean Bordaxar, Robert Larrandabürü, Ttuttu Luro eta Jean-Noël Pinque, Xiberoko Zohardia, Ürsantxak eta Errejentak.
Madouce Araguas alkarteko kidea da, eta erran deikünaz, Apetab 64 alkarteak egiten düan lanaren oihartzünak ükeiten dütüe Tarijatik.
Madouce Araguas entzün :

Clic Xendak antolatürik beste alkarteen lagüntzarekin, Aste urdina egiten da Xiberoan ere urtez-urte. Adinetakoer informazioa ekartea eta belaünaldien arteko zübü bat proposatzea da xedea, gazteak adinetakoekin nahastez. Bereziki erretretan sartü berri direner, beren denbora libreaz zer egiten ahal düen jakinarazi nahi zaie.
Aurten hiru hitz ordü proposatürik dira dagün astelehena eta ostegüna artean. Astelehenean, Mauleko parropia gelan, adinetakoen salua antolatürik da. Han izanen diren alkarteen zerrenda lüzea da. Josette Bosq :

Aste urdina :

Ürrietaren 19, astelehena : Arrestiriko 2etarik 5etara, Mauleko Parropia gelan

Ürrietaren 20, asteartea : Arrestiriko 2etarik 4etara, Atharratzeko kirol gelan

Ürrietaren 22, ostegüna : Arrestiriko 3etarik 5etara, Mauleko zerbütxü günean, Irati gelan

Mauleko Kürütxe Gorriak üsatü formakuntzak proposatüko dütü berriz ere. PSC1 diploma, hots lehen sokorrietako diploma kausitzea da alde batetik proposatzen düana. Norbait trenpü txartzen delarik, segidan zer egin behar den jakitea da beraz holakoetan ikasten.
Entzün argibideak Kürütxe Gorriko Gaxusa Pontaurenganik :

IKASTALDIEN DATAK :

PSC1 diploma :
Ürrietaren 3an eta 10an (neskenegünak) goizean 9ak eta 12.30 artean eta arrestiriez 1.30 eta 4ak artean

"Défibrillateur" :
Ürrietaren 9an (ostirala) arrestiriko 7etarik gaüko 10etara.

Xehetarzün güziak : 05 59 28 18 36