Mendiz Mendi korala botzik agertzen da 2011ko urteaz, salbü kantari eskaza badela. Iragan urtean sorarazi züen « Missa Creoli eta Navidad nuestra » lanekin gozatü dira Mendiz Mendikoak. Basabürü eta Ibar Esküineko elizetan egin rezitalen bidez, lan arrahein bat egin ahal izan düe eta berek deioienaz, abesbatzako botzen kalitatea hobetü da. 2012 urtearentako ere, lan gotorrik badükee egiteko. Aldi hontan, beste sortze lan bati dira paratüko, "Magnifikat" bat da, 90ko obra garaikide bat. Mendiz mendi koralari, beste bi koralak jüntatüko dira bai eta Paueko amatürren orkeztra klasikoa ere. Orotarat, 100 kantari eta 40 müsikalari beharrezkoak dira lan honentako. Bestalde, Basabürüan elizaz eliza ebili ziren bezala, 2012ean Pettarrekoetan dira kantüz ariko Mendiz Mendikoak. Arte hortan, mustrakan ariko dira asteartez Alozeko haurzaintegian eta kantari berriak xerkatzen dütü alkarteak, jakitez müsikaren erakurtea ez dela beharrezkoa.

Entzün Félix Laxague Mendiz Mendi alkarteko bürüa :

Agosti Xahoren sortzearen 200 gerren urtebürüaren ospakizünak ürrietaren 9ean ürrentü dira bere sortherrian Atharratzen. Lehenik, mezperan Baionan Eüskal Erakustokian, Xahoren bizia eta obrak aipatü dira. Xaho pertsonaje berezia, gizon aparta eta ez ezagüna, hona besteak beste zer entzün den aste bürü güzian. Xaho en bizia eta obrak zabaltü behar direla  erran dü Elixabet Pignol, Agosti Xaho kültür alkarteko lehendakariak ! Lan hortan parte hartzen düalakoz, Eüskal Erakustokiari Xaho saria emanik izan zaio Atharratzen egin den omenaldian.

Entzün Elixabet Pignol Xaho alkarteko bürüa :

Xuri ta beltzez, jente potreta ala bazterrak erakustez, bere barne alde ülüna nahi izan düala erakutsi, Jon Cazenave Donostiako argazkilaria berak erran deikünaz. Herri Ixilean deitzen den erakuska, Lapurdi, Baxenafarroa eta Xiberoan hartürik argazkiaz osatürik den argazki erakuska ikusgei da Mauleko Ondarrearen Etxean azaroaren 12ala.

Entzün Jon Cazenave argazkilaria :

1811ko ürrietaren 10ean sortü zen Agosti Xaho Atharraztar idazle, poeta, politika gizona, besteak beste, erran nahi beita düala 200 urte. Urtebürü horren ospatzeko ekitaldi ezbardinak antolatürik dira ürrietaren 8 eta 9ean. Neskenegünean Baionako Eüskal Erakustokian mintzaldiak izanen dira egün orotan. Biharamenean ürrietaren 9ean, Atharratzen bere sort herrian omenaldi bat eginen zaio. Goizanko 11:30tan hasiko da jeia, antzerki baten bidez bere ibilbidea erakütsiko düe sort etxetik Daguerre jauregialat arteko bidean. Ondotik, herriko plazan Agosti Xaho saria eskentüko düe Baionako Eüskal Erakusketari. Giro ederrean ürrentzeko züntzür bustitze bat izanen da apaidü batekin mahain baten üngürüan. Bestalde, Atharratzeko besteen denboran emanik izan diren Agosti Xahoren kantoreak, berriz Bizkaian emanen dütüe urtea ürrentü gabe.

Entzün Milou Castan Xiberoko Zohardia alkarteko bürüa :