Kalitatezko ikusgarriak, pübliko gaztea kültürari heztea, ekonomikoki denentako esküragarri izatea, hona Maule Hiriko kültür sailak berretsi dütüan lehentarzünak, 2011-2012 kültüraldiaren presentatzean. Hostoak, Amaia Riouspeyrous, Manu Galure,  Babouchka konpaniaren « Nous Sommes une femme », Marc Antonio de la Parra-ren « La secrete obscénité de tous les jours », ala Feydeaux-ren “Le chat en poche”, antzerki, zirka, dantza, kantore eta müsika eskentürik zaizkü egitarau hontan. Eüskarak ere bere leküa edireiten dü programazionean eta komünikazionean, Herri Alkargoaren partaidegoarekin. Dagün setemerearen 24ean neskenegünarekin, Maule Hiriko kültür sasu berria estrenatüko da, "Ieto eta Le Casse Bouteille" ikusgarriekin, "Hostoak, Kukai konpania, Amaren Alabak eta Oreka Tx" biltzen dütüan ikusgarria ürrietaren lehenean errezebitü aitzin.

Entzün Julie Bercetche Maule hiriko kültür sailako ardüradüna :

Setemerearen 16, 17 eta 18ean Ondarrearen Egünak igaranen dira. Aurten gei bezala, « Ondarrearen bidajea » haütatürik izan da eta Xiberoan badate zer ikus eta ikas. Ikerzaleak alkarteak kudeatzen dütü egün horik beste partaide zonbaiten lagüntzarekin. Ostiralean arratseko 19.30tan Larraineko elizaren bijita date, ondotik Denen gelan, Valérie Sténou eta Robert Elissondok hitzaldi bat emanen düe Larraine eta Ospitale-Peko elizetaz. Aste ondarrean, üsatü bijitak egin daitezke, bena hitzordü nausia neskenegünean 17.00 date Mauleko karriken gainti antzerki bijitarekin, Gaztelüko Lagünek proposatürik. Bestalde, arratseko 20.00tan Gotaiñen Gisele Lougarot " Bigerren Gerla Mundialako xiberotar mügalarietaz " mintzatüko da. Igantean aldiz, Ondarrearen Etxean Denis Cassardek eraman düan lana ikus dezake, bidajetaz ari den libürü zaharrekin. Hona Ikerzaleak plazaratü düan egitaraoa.

Entzün Joël Larroque Ikerzaleak alkarteko kidea :

Monzon pastorala emanen da Bergaran setemerearen 17ean, Telesfororen sort herrian 3. eta azken aldikoz. Larraintarrek Xiberoa bezain handi den Gipuzkoako herri honen bidea hartüko düe neskenegün goizan. Jesus Elorza Bergarako aüzapezak erran deikünaz, Bergarako herria ohoratürik izan da Monzon pastoralarekin eta ez zen manera hobeagorik Telesforo de Monzon hiltzearen 30 gerren urtebürüaren ospatzeko. Larraiñe eta Bergararen artean anaitarzünezko harreman honak sortü dira üda hontan eta elkarlanean iraünen düela esperantxa düala gehitü deikü Bergarako aüzapezak. Neskenegünean arrestiriko 15etan Bergarako karriken üngürüa eginen düe Larraintarrek eta 17etan  Monzon pastorala 3. eta azken aldikoz emanen düe.

Entzün Jesus Elorza Bergarako aüzapeza :

Hogei urtez egürüki ondoan, Eüskal Etxea zabaltü da berriki Pauen. André Labarrère zena, Paueko aüzapez ohiak hitzeman züan Paueko Euskaldüner « Eüskal Etxe » bat ükenen züela, bena azkenean elkibidea "Lagünt eta Maita" alkarteko kideek berek atzaman düe, 300 metra karratüzko egoitza bat alokaidatüz. Paueko güne ezberdinetan barreiatürik ziren dantza, kantore, müsika ala gaü eskola bezalako aktibitateak ber egoitzan bildürik dirate. Frantxoa Challet alkarteko kidea erran deikünaz, algarrekin bitzitzen ikasi beharko düe, bena "Eüskal Etxeak" dinamika berria ekarri behar lüke eta xede berriak sortüko laster.

Entzün Frantxoa Challet Lagünt eta Maita alkarteko kidea :