Eüskara uhuratürik izan da Maulen arramaiatzaren 25ean. Xiberoan Eüskaraz Bai-ek beste 15 alkarteen lagüntzarekin antolatütako egünaldiak arrakasta bildü dü goizetik ülüntziala arte. Erakuts mahainen üngürüa egin ondoan 100 bat jente algarrekin bazkaltü dira. Arrestiritan, haur eta gazteentako leküa ere bazen, jokü eta antzerkiekin besteak beste. Arresti aphalean Xiberotar dantzak emanik izan dira eta ondotik jente güziak egürikitzen züen Flashmobaren aldi izan da, azken horrek arrakasta ederra bildü dü. Gaüaldia ontsa ürrentzeko poteoa egin da Mauleko ostatüetan eta Zinkan ürrentü da kontzertü batekin.

Entzün Marie-Jo Thornary Xiberoan Eüskaraz Bai alkarteko süstazalea :

Monzon pastorala lehentze osorik emanik izan da arramaiatzaren 11an soinügileen lagüntzarekin. Hilabete eterdi baratzen zaie Larraiñtarrer pastoral egüneko prest izateko. Makil kaskak orano entzüten badira, aitzinlanak ere aitzina doatza. Dendariak karraskan josten ari dira eta lagüntzaleak pastoral egüneko bildürik dira. Larraiñen izatez, botz ederrak ere ezagün dira mustrakan entzün den bezala. Bestalde, Irkus Roblez-ek Partarrieuren lagüntzarekin egin düan margoa date Monzon pastoraleko afixa. Ikurriña eta makila ageri dira Monzonen erakusteko eta Berterretxen etxea Larraiñe itxüraren erakusteko. Telesforo de Monzon, Jean Bordaxarek idatzirik pastorala, agorilarren 7an igantearekin emanik date eta agorrilaren 13an neskenegünarekin.

Entzün Jean-Pierra Accoceberry Monzon pastorala alkarteko bürüa :

Numerikoaren heltzea ez dü baitezpada jente haboro ekarriko zine geletarat eta Maule Baitha alkarteak betiko nekeziak ezagützen dütü aitzinkontüen orekatzeko. Hona zer agertü den zinemaren alkarteko biltzar nausian. 16000 sartze beno haboroekin, püblikoaren parte hartzea % 4ez goratü da. Bena argi indarra, gaza ala hura bezalako kargüak beti emendatzen dira. Ondorioz, Mauleko Herriko Etxearen lagüntza izanik ere, alkartearen egoera hauskorra egoiten da. Alkarteko ardüradünek erakustera eman düe, püblikoaren gehiengoa Xibero osotik horra dela eta xüxen lizateke Herri Alkargoak zine gelaren ibilmoldean parte har dezan ere bai.

Entzün Emmanuel Vanouth Maule-Baitha alkarteko bürü ohia :

Urte oroz bezala, Tipiñakoa egin da Xiberoko Gaü Eskolak antolatürik. Aldi hontan, Xiberoko Gaü Eskolako kideak eta beste jente hanitx Ozaze herrian bildü dira egün goxo baten igaraiteko. Goizan, 13 taldeek axurkia adelatü düe eta 120 jente beno haboro bildü dira egüerdiko bazkarian axurki salsa ezbardinen txestatzeko. Bazkariaren ondotik, Pierre Visslerek bere aktür ganoa erakutsi dü « No future » eüskarazko antzerkian eta gaüaldia ezinago ontsa ürrentü da antolatürik ziren kontzertüekin. Prefosta, Tupiña berri bat badate dagün urteko, artean, Gaü Eskolak jaraikiko dü bere helbürü nausiarekin : Jentea eüskaldüntzen eta Eüskara maitarazten ! Gogoan etxek dezagün ere, Gaü Eskolak bere urteko ikastaldia antolatüko düala agorrilaren 1etik 6ala Mendikotan. Parada berri bat eüskararen ikasteko eta eüskaraz gozatzeko !

Entzün Jef Goihenexpe Xiberoko Gaü Eskolakoa :