Egürra energia berriztagarria erabiliko düen lehen xedeak, argiaren ikusteko mezperan dira dagoeneko Xiberoan. Egün horietan estüdio bat hasiko da, Maule, Atharratze eta Gotainen, hiru bero sareen eraikitzea egingarri denez ikertzeko. Bero sare batek, egürrarekin hur beroa egiten düan galdera batetik, eraikin pübliko, enpresa edo etxe batetara, barneko berokuntzarako ala xahatzeko hur beroa banatüko dü. 2 000 tona egür behar lizate hiru bero sareen ibilarazteko, Xiberoko oihanek aise segürtatzen ahal düen kantitate bat. Estüdioa Akitania eskualdeak dirustatzen dü eta sareen infrastrüktüraren kostea Departamentüko Elektrifikazio sareak bere gain hartü behar lüke.

Entzün Bertrand d'Hulst Xiberoa Herri Alkargoako energia berritagarria sareko teknikalaria : 

"Txilintxoi" deitzen da Ürrats Berri alkarteak dagün azaroaren 2an agertüko düan ikusgarria. Idazlea delarik, Beñat Elkegaray Mauletarra. Haur bat lotarik iratzartzen da eta iratzarri ondoan, beste mündü batetan kausitzen dü bere bürüa. Hari hori jorratüz, haur baten handitzeko ibilbidea agertü nahi dü bena gibelean beste mezürik ere irakur daiteke. Dantza , müsika eta antzerkia baliatürik dirate ixtoriaren kontatzeko. Ürrats Berri alkartea, "Antso Handia" pastoralaren denboran sortü zen Maulen. Alkarte honek, hiru adar badütü, dantzarena, kantorearena "Kalaka" taldearekin eta dendariak. Bekan baizik ez zirelakoz alkartzen, jei hau antolatü düe, bena ere, eüskarazko lan baten eskentzeko gogoarekin. Bestalde, jeiaren afixarentako, lehiaka bati pentsatü düe, haur eta gehitüek parte hartzen ahal dükee. Proposamenak, arramaiatz ondarreko helarazi behar dükee alkarteala.

Entzün Beñat Elkegaray Ürrats Berri alkartekoa : 

Ezpeize-Ündüreineko Herritarrek antzerki sorkuntza bat presentatüko düe. 2008an Xiberoko Jauna pastoralean parte hartü züen lau herriek parte hartüko düe. Antzerki hau, kantore eta dantzaz osatürik da. Helbürüa da zenzibilizazione lan bat eramaitera, antzerkia delarik tresna. Frantsesa üsü baliatürik date dener mezüa hedatzeko. Gazte andana bat bada, horien artean Iker Uthurralt süjeta eta Jean Choury-k bere antzerkilari trebetarzüna erakutsiko düalarik bigerren kargü nausian. "Aitzina mintza" antzerkia maiatzaren 4an gaüko 21.00tan iraganen da Ezpeize-Ündüreineko Denen Gelan.

Entzün Armand Elgoyhen parte harzale bat : 

Denboro ederrarekin, jenteak saldoan jin dira Santa Grazira, apirilaren 13an igaran den Haur Kantu Txapelketako Xiberoko erdi-finalala. Aurten orano, HKTak arrakasta bildü dü 27 talde, 160 kantariek parte hartü düe. Talde handienak Xiberoko eskolak ziren, Arbailletik, Pettaretik eta Basabürütik jinik. Kantore haboroxenak ezagünak ziren "A Capellaz" kantatürik. Lau sorkuntza ere entzün ahal izan dira Muskildi, Aloze eta Sohütako eskolen partetik. Epai mahaina Xibero Gaineko kantari gazteak ziren : Ihitz Iriart « Amaren alabak » taldekoa, Johañe Etxebarne Ajia « Xiberotarrak » taldekoa , Kattin Intxauspe « Izarrak » taldekoa eta Alexia Aytaberro Santa-Grazikoa. Hona epai mahainak, finalala joaiteko haütatü dütüan kantariak, bederazkan Cédric Elgoyhen Santaraztarra, biazkan Sohütako Ikastolatik Oihana Urruty eta Ana Iraola, taldekan Muskildiko eskola, püblikoen saria Larraineko  Errege Txopitak taldeari joan da. Arramaiatzaren 16an Nafarroan igaranen den Haur Kantu Txapelketako finala joanen dira 4 talde horik.

Entzün irabazle zonbaiten lekükotarzünak :