Üda hontan kültür eta inganio eskentza franko proposatzen dütü Xiberoko Turisma Bülegoak. Ohizko hitzordüetarik kanpo, lehentze opera bat emanik izanen da Xiberoan Mozarten obra bat «Don Giovanni». Beste urtez bezala ere, müsika klasikoa entzüngei date Altzürükün eta Irurin. Aurten, Mauleko hondarea gogoan date eta aste batez hitzordü ezberdinak badirate. Ahatze gabe hitzordü nausiak, Garindaineko kantaldia , René Cassin pastorala, Espartiñaren Besta, bestea beste. Pelotak ere bere leküa badüke frankotan, orotarat 200 alteko ekitaldiak badirate üda hontan Xiberoan. 

Entzün Chantal Guissagaitz Xiberoko Turisma Bülegoko züzendaria : 

"Muskildi bizi" alkarteak herrian animazione proposatzen dü. Aldi hontan, "Jondane Johane" egünean arramaiatzaren 23an bildüko dira San Antonin. Egün orotan animazione franko izanen dira, goizanko 9.00tan– Ibilaldia Muskildiko plazatik abiatüz - 10.30tan Saratsagako Agereberreko olhan kafea. Hortik « Bertso-ibilaldia » izanen da Xiberoko bertsolariekin - 12.30tan Bertso zonbait, txalaparta eta züntzür bustitzea - 13.00an bazkaria - 15.00tan Joküak haurrentako, birla lehiaka - 17.00tan Kantaldia Muskildiko neskatxunak eta Amaren Alabak - 20.00tarik harat, ostatüa eta ogiartekoak - 22.00tan "Jondane Johaneko" süa eta dantza. Ebia balitz, San Antoniko txapelan jünta leioie egüerditan.

Entzün Jean-Mixel Gastellussary "Muskildi Bizi" alkarteko kidea : 

Idauze-Mendiko eskola botingoak, urte osoan eraman xede pedagogikoaren emaitza eskentüko dü arramaiatzaren 22an neskenegün arrestiarekin 16.00tan eskolako barrioan. Eskola hortako ikasle güziak maskaradari dira paratü. Bedera bedera kargü güziak aztertü dütüe, bertsolaritzari paratü, kabana eta buhameen perediküak pentsatü eta beste. Ariketa hau jokü bat bezala hartü düe haurrek, alta ber zoinean, eskolako programa jarraiki düe ürratsez ürrats, izan idatzian, irakurtzean ala ordenagailü lanetan. Bestalde, algarren artean lan egiten eta alkar errespetatzen ere ikasi düe. Proba bat ez dela orenak eta orenak ttotto egon beharrik ikasteko. 

Entzün Maritxu Davant Idauze-Mendiko eskolako errejentsa : 

Bada urte zonbait, SÜ AZIA alkartea Xiberoko Kültür ta Hondareko hontarzün biltzen eta zaintzen ari dela. 12 000 soinü iraganik, pastoral, dantzari argazki, xiberotarrez textu idatziak badira SÜ AZIAN. Azken urte horietan, Maddi Oihenartek dü lan hau kudeatzen. Interneten ere, lanaren parte bat entzüten ahal da SÜ AZIAko webgünean. Beste lanetan, Xiberoko herrien eta kartielen izen biltzea eraman dü Battittu Coyos alkarteko kideak. Bestalde, dantzaren üngürüan jente zonbait filmatzen ari da SÜ AZIA, xede hau Eüskal Kültür Erakundearen partaidegoarekin eramanik da. Azkenik, hiruzpalau libüru xiberotarrez argitaratzea xedea dü alkarteak, memento hontan "Le Petit Prince" Saint Exupéryen obra salgei da Sü Aziaren egoitzan. 

Entzün Panpeia Etxebarne SÜ AZIA alkarteko bürüa :