Depütatü Bozketako haütageien agerpenarekin jarraikitzen dügü. Gure eskualdean, François Maitia da alderdi sozialistaren haütageia  eta bere ordaria Elisabeth Médard. Garazi eskualdeko Kontseilü Orokorrak, sozialista gehiengo bat nahi deio eman François Hollande lehendakari berriari bere politika gaüzatzeko gisan. Esperantxa dü lehendakarigoako bozketan, barnekaldean ere, sozialistek kausitü dütüen emaitza honak beretsiko dütüela. Mendiko laborantsa, Ipar Eüskal-Herriko Instituzio berezia ala eüskararen ezagütpena, sail horien aitzinaraztea xedea dü François Maitiak, haütatürik bada dagün arramaiatzaren 10 eta 17ko bozketan.

Entzün François Maitia Garazi kantonamentüko Kontseilü Orokorra : 

Depütatü bozketan, Pedro Carrasquedo Arrokigesa da NPA alderdiko haütageia 4. eremüan eta Eric Laclau bere ordezkaria. Langileen kanporatzeak debekatü, lana partekatü, soldatak goratü, erretreta 60 urteetan, denentako alojamentü bat, lehendakari bozketako ber aldarrikapen nausiak lüzatze dütüe berriz. Horrez gain, ezpekülazioaren kontre, bi proposamen egiten dütüe. Lehenik, legar baten sortzea bigerren etxebizitzetan, etxe zaharren arraberritzeko, berrien egiteko eta lürren erosteko, bigerrenik, SAFER egitüra püblikoa izan dadin, egiazki laborantsan plantatzeko gazteen lagüntzeko. Azkenik, beren alkartarzüna lüzatzen dü, borrokatzen diren Carrefour Market saltegiko langileer, baita ere Mauleko Ospitaleko erier, erretretadüner, beren familier eta langileer.

Entzün Pedro Carrasquedo Legebiltzarreko bozketan presentatzen den NPA alderdikoa : 

Robert Barreil Oloruetarra da Front de Gauche alderdiaren haütageia 4. bozka eremüan eta Hélène Ducarre Hazpandar laborarisa bere ordezkaria. Laborantsa ttipiaren zaintzean, zerbütxü püblikoen berantolatzearen alde bena ororen gainetik, hezkuntzari, osagarriari, alojamentüari baita energiari, eskübidea bermatüko düan gizarte alkartarzünago baten alde agertzen da Robert Barreil Front de Gauche alderdiko haütageia. Horrez gain, Eüskal Herriarentako Instituzione berezi baten alde agertzen da. Eüskararen ofizialtarzünaz ez dü bai ala ez ihardetsi bena "Hizkuntz Gütitüen Hitzarmenaren" izenpetzeko alde jarten da.

Entzün Robert Barreil Front de Gauche alderdiko haütageia : 

Arramaiatzaren 10 ta 17ko Legebiltzarreko bozketan parte hartzeko izenen emaiteko azken epea zen maiatzaren 18ean. Departamentüko laugerren eremüan, hots gure eskualdean, 13 haütageien artean haütatü beharko da. EH Bai koalizioko Anita Lopeperi hitza emanik, aldi hontan beste haütageiekin mintzatüko gira. EAJ-PNBk bere haütageiak badütü, Pako Arizmendi Garaztara da eta Philippe Duhalde Xiberotarra bere ordezkaria. Beren kandidatüaren ildo nausia da Ipar Eüskal Herriko Institüzio berezia eta ber denboran Biarnesek ere bat üken dezen, alde agertzen dira. Departamentüak eta Akitania eskualdeak dütüen eskümenak bildü ahal lezazke Institüzio honek, hebenko garapen ekonomikoa eta kültürala hobeki kontütan hartzeko. Bestalde, Eüskararen ofizialtarzüna eta Xiberoko Bidea xedeen alde agertzen dira EAJkoak. Bozken lehen ützülüa aitzin, haütagei bakotxari hitza eman deiogü, Xiberoko Botzean mahain üngürü bat hedatüko beita arramaitzaren 4ean astelehenarekin 19etan, parte hartü nahi düen haütageiekin.

Entzün Paco Arizmendi eta Philippe Duhalde EAJ-PNB alderdiko haütageiak :