Hitzekin txostakatzez, eüskararekin txostakatzea eta gozatzea asmüarekin hasiko da XILABA, Xiberoa, Lapurdi eta Baxe-Nafarroko bertsularien txapelketa, xapel meta. Lehen kanporaketa, ürrietaren 6an iraganen da Altzürükün arrestiriko 17etan sei bertsulari lehiatüko dira, Ortzi Murua, Ortzi Idoate, Maindi Murua, Maddi Ane Txoperena, Xan Alkhat, eta Egoitz Zelaia. Bigerren kanporaketa ürrietaren 13an iraganen da Kanbon beste 6 bertsulariekin. Alde batetik, Amets Arzallus txapeldüna lehian sartuko da, Hendaiako final erdiaren kari, Eneritz Zabaletarekin batean. Bestetik, Hodei Barroso txapeldün ordaria eta Sustrai Kolina, bigerren final erdian ariko dira. Final erdiak ürrietaren 20an Hendaian eta 27an, Donibane-Garazin jokatüko dira eta finala azaroaren 10an, Baionako Lauga gelan.

Entzün Xan Alkhat bertsularia eta bertsu erakaslea : 

Oarsoaldeko anai-arrebak errezibitüko dütüe, Basabürüko Ikastolako etxekoek, setemerearen 22an Omize-Gainen, Zazpiak Bat egünaren kari. Oarsoaldea, Oiharzun, Orrereta, Lezo eta Pasaia herriak biltzen dütü. Düala hiru urte, Ikastola eta Oarsoaldearen arteko harremenak sortü ziren. Geroztik, urte oroz hebenko dantzariak, kantariak eta bertsulariak Gipuzkoako eskualde hortara joan dira, hebenko kültüraren ezagütarazteko. Aldi hontan, hurak dirate errezibitürik. Azkorria gaznakagia bijitatürik, Omize-Gaineko plazan, hebenko eta hanko dantzariek eta kantariek ikusgarria eskentüko düe. Ondotik, züntzür bustitzea eta bazkaria partekatüko düe, bi eskualdeko bertsolariek alegeraürik. Arrestiritan, Xiba joküak izanen dira eta gaüan pastetxak eta dantzaldia.

Entzün Aña-Mari Errequet Alozeko ikastolako lehendakaria : 

Denbora ederra, müsika, dantza, bertsu, bazkari, ez zen deüseren mentsik, Alozeko Ikastolako eta Gipuzkoako Oarsoalde hirietako adixkidantzako egünaldia ontsa iragan ledin. Egünaldi horien garantzi edo inportantzia denek aipatü düe. Algar ezagützeko parada eskentzen dütüelakoz eta ohartzen delakoz, funtsean, ezberdintarzünak ez direla hain handiak.

Entzün Zazpiak bat egünean ziren jente zonbait :

Setemerearen 22an , Eusko Ikaskuntza, Barkoxeko Herriko-Etxeak eta Etxahun alkarteak, Etxahun-Topet Barkoxe eta pastoralaren üngürüko hitzordü bat eskentüko düe. Jean Harritxelar eüskalzainak Etxahunetaz hitz eginen dü. Alde batetik, nolako jentea izan den , mitoa eta errealitatea bi gaüza direla agertaraziz. Etxahunen poesiaz ere hitz eginen dü eta erakutsiko dü bere denboran, Europan zen « Erromantismo » ildoan kokatzen zela. Pastoralari ere arte bat emanik izanen zaio, 60 hamarkadako pastoral filma llabür zonbait ikusten ahal beitirateke. Gisa horrez, ikusten ahal date lehenago ere kanbioak bazirela eta pastoral batetik besteala, tauladatzeko manerak ezberdinak bazirela. Herriko kantariek ere, Etxahunen kantak emanen dütüe, hala nola, Maddi Oihenart, Jean-Noël Pinque, Ttuttu Lüro, Dominika Üthürriborde ala Lucien Larraus-ek.  Hitzordüa setemerearen 22an neskenegünarekin 10tarik harat Barkoxeko Denen-Etxean.

Entzün Patrick Queheille Etxahun alkarteko bürüa :