Kostaldearen erakarpenak, besta batzordetan gaztenen sarrarazteko nekeziak eta jeien kostüak gaitz egiten dü besten antolatzea. Hori da agertü Hokin, Azia alkartearekin batean, egin den Xiberoko besta batzorden arteko bilküran. Errealitate orokor baten kanbioak ere sendi dira. Hiri ttipietan eskolarik ez denez, ez da herriko talderik sortzen, eta lagün arteko sareak, sorterritik kanpo antolatzen dira. Halere, gazteak, herriko besten antolatzearen beharraz ohartürik dira, herriari bizia emaiten beiteie, azpimarratüz haatik ez dela bizi hori gazteen eskü baizik üzten ahal. Ttittika Recalt joan da gazteen mintzaraztea

Üsatü egüberriko animazioneak abiatzen dütü aste ondar hontan, Xiberoko Salerostünen Batarzünak. Hilabete batez animazione franko proposatüko dütü, eta horien artean, zozketa handi bat Xiberoan egüberriko erospenak egiten dütüenentako. Beste hitzordüetan, lehena abentüaren 9an, Telethon-ekin batean, bizikleta kilometroak erosten ahal dirate « Mika fitness » kirolgünearen süstengüz . Ondoko aste ondarretan, eskolekin hitzordüak, filmak, edo orano ipuin kontatzeak izanen dira. Honekin erakutsi nahi düe Xiberoan ere saleroska sare indartsü bat eta dinamika bat badela, interneteko lehiaka gaintitzen ahal düana. Peio Queheille :

Mauleko herriak Sü Aziak alkartearekin partaidetzan antolatzen dü bihar goizanko hitzordüa. Eñaut Etxamendi date kümita, edo hizlaria. Harek tesia bat idatzi dü, zointan eüskara eta hizkuntza indoeuroparrak parekatzen dütüen. Ezi, 19. mentetik erranik da eüskara ez dela hizkuntza indoeuroparra, hots ez dela Europako hizkuntzen familiakoa. Eñaut Etxamendik dio eüskara hizkuntza indoeuroparren arbaso edo aitzinekoa dela. Horren segürtatzeko, 4.000 hitz beno haboro ikertü dütü eta beste hizkuntza hanitxekin parekatü. Horik oro esplikatüko dütü mintzaldian. Argiago izateko, Roger Courtois jaunak lagündüko du bideo elibatekin. Hitzordüa neskenegün goizan 10:30etan Mauleko Zerbütxügüneko ‘Irati' bilgian. Eñaut Etxamendi :

Barnealdeko Irakurleen Klubak Eusklabo Alaiak libürüaren aurkezpen edo presentazionea eginen dü ostirale gaüan. Asisko Urmenetak dü idatzi Eusklabo Alaiak komiki edo marrazki bildüma. Hori parodia bat da, hots ez dü deüs asmatzen, jüsto gertakariak azpimarratzen. Bena funtsa eta moldearen haboro barnatzeko, Asisko Urmeneta komiki egilearekin xüxenka mintzatzen ahal date. Ezi, BIKekoek hitzordü horietara aldikal egilea kümitatzen düe, harekin hitzen trükatzeko parada eskentzez. Arren, hitzordüa ostirale hontan, 18:30etan Urdinarbeko herriko ostatüan. Prefosta ororer zabalik da. Allande Etxart :