Nolako Laborantsa Biologikoa garatü nahi düen, sail hortan ari diren laborariak gogozkatü dira, Donaixtin egin den Iparraldeko Laborantsa Biologikoaren lehen biltzarrean. Goizarekin, arraudiak, balio erantsia, laborantsa politikak, lagüntzak, lürra, instalazioa eta formakuntza, lan taldeetan aipatü düe 60 laborariek, norabideen eta beharren finkatzeko. Arrestiarekin, Laborantsa Kanberako Haüteskundeetan presentatzen diren sindikatak kümit ziren, beren ikusmoldearen emaiteko eta gogoetarik elki diren proposamener so, engajamentü baten hartzeko. Zorrigaitzez, hiruetarik ELB/Confédération Paysanne sindikateko ordezkariak berak agertü dira. Dena den, algarrizketa eramanik izan da eta adostarzün püntü hanitx agertü dira.

Entzün Jon Harlouchet Biharko Lürraren Alkarteko kidea : 

2013ko Laborantsa Kanberaren Haüteskundeen mezperan, "Departementüko Laborantsa Kanberak" kudeatzen düan taldearen azken biltzarra egin dü Pauen. 2013ko aintzin kontüak eta orientabideak bozkatü dütüe eta azken bost urteetako bilana egin. Düala 5 urte finkatürik ziren helbürü haboroenek kausitü düelakoz, botzik agertü da Jean-Mixel Anxolabehere Departamentüko Laborantsa Kanberako lehendakaria. Haatik, 2013an galtzetan izanen diren aitzin kontüak bozkatü dütüe, Kanberako teknikalarien etxekitzea beita lehentarzüna. Bestalde, 2013an orientabideen aldetik, sos lagüntzak eta lürren gaineko legarrak ttipitzen ahal beitira, laborarier da Lürralde Kolektibitateer eskentzen dütüe zerbütxüen garatzea...

Entzün Jean-Mixel Anxolabehère Departamentüko Laborantsa Kanberako lehendakaria : 

Departamentüko Laborantsa Kanberaren hartzeko, Coordination Rurale sindikata presentatzen da 2013ko "Kanberako bozkeetan". Guy Pebayle Crouseilleko laboraria eta APLI-ko ardüradün ohia da zerrenda bürüa. Zerrendan ez da Eüskaldünik bena departamentüko laborari güzientako lan eginen düela hitzeman düe, Pauen egin den zerrendaren presentazionean. Beste kudeatze bat proposatzen düe, sindikat güzier batzorde ezbardinetan parte hartzeko ahalak eskentzez. Bestalde, gogorki salatzen düe Departamentüko Laborantsa Kanberaren orai artinoko joka moldea, non ere FDSEA sindikataren interesa baizik ez dela kontütan hartürik. Lürraren zaintzea, gazteen plantatzea eta hazkuntza izanen dira CR kanpainaren ardatz nausiak.

Entzün Coordination Rurale-ko Guy Peybale : 

Biarnoko Etxe Ekoizpen egile diren lau laborari algarretatü dira, saltegi handi baten zabaltzeko Paue Iparrean den Serres-Castets herrian. Saltegian, beste 45 laborarien ekoizpenak edirenen dira. 400000 euroko inbestizamentüa egin dütüe, 300 metra karratüzko saltegiaren egokitzeko. Lau langile hartüko dütüe saltegiaren ibilarazteko eta laborariek animazioneak segürtatüko dütüe, erosleekin harreman xüxenen ükeiteko. Ekoizle eta partaideen haütatzean, kalitatezko ekoizpener eta gazteer lehentarzüna eman deie. Ekoizpen egileen erdia, 30 urtez peko laborari gazteak dira. Saltegia abentüaren 5ean zabaltüko da.

Entzün Philippe Lalanne xedearen eramailea :