Bortükariak alkarteak eramaiten düan "Olha" xedearen barneko lehen arraberritze lanak hasi dira Larraineko Olhadübiko olha zaharrean. Ürrietan hasirik, obrek urte batez iraünen düe eta 45000 euro kosteko düe. “Olha” xedea, Leader Eüskal Mendia europear egitasmüan sartzen da eta haren bidez sosez lagüntürik da. Ondoko bi urteetan, “Ganagerre” Santa- Grazin eta “Zihigolatze” Iratin arraberritüko dütüe. Ibilzaleek, arrantzükariek edo nor nahik erabilten ahalko düe, pausatzeko edo gaü baten iragaiteko aterbü pean.

Entzün Jean-Claude Séhabiague Bortükariak alkarteko kidea : 

« Bihar Artzaina » ardi sailako azizak Aiziritzen igaran dira Departamentüko, Korsikako eta Aveyroneko ardi sailekoekin. Inkestaren emaitzan, ardi hazleen adinaren goratzea, ekoizteko prezio emendatzea, sos lagüntzen menpekotarzüna, hona agertzen diren arrenküra nausiak. Diagnostika hortarik plan estrategikoa nahi da sorarazi, podere püblikoen aitzinean botz bakar batez ardi sailaren eskakizünen presentatzeko. Geroari bürüz, gazteen plantatzea, transmizionea, errebenioa, edo mozkinen leküa merkatüan izanen dira lan ardatz nausiak. Algarren artean eramaiteko ekintzak finkatüko dira, eskualde bakotxeko ardi sailaren lehiakortarzünaren azkartzeko. Bestalde, ardi sailako azizen abiatzean, ELB sindikateko laborari multxo batek banderola baten gibelean bildü zen, «Ossau-Iratiren kopiarik ez Aveyronen !» salatzeko.  Ekintzaren egiteko mementoa hautatürik izan zen Robert Glandières Roquefort-eko lehendakaria parte hartü behar beitzüan Azizetan, bena azken mementoan parkatürik izan zen.

Entzün Daniel Lartigue Departamentüko Laborantsa Kanberako ardi saileko ardüradüna  :

Urdiñarbeko Ardi Zentroak, etxalteen autonomia eta kabaleen bazkatzeko moldeen hobetzeko informazione bilkürak proposatzen dütü ondoko egünetan, Oloruen, Iholdin, Izpuran eta Maulen. Idortea edo bazkeen prezioen gatik hazleak arrenküratürik agertzen dira eta kabaleen bazketan ekonomiak nahi dütüe egin. Holako egitateak izaten ahal dütüen ondorioetaz eta izaten ahal diren beste elkibideetaz informazione ekarri nahi dü Ardi Zentroak. Lehen hitzordüa, ürrietaren 17an Oloruen date Laborantsa Lizeoan. Bigerrena Iholdin, ürrietaren 18ean. Hirugerrena Izpuran Laborarien Etxean eta azkena ürrietaren 23an Urdiñarbeko Ardi Zentroan. Orai danik, izenak eman 05.59.28.05.87 zenbakiala deitüz.

Entzün Jean-Michel Noblia Urdinarbeko Ardi Zentroko teknikalaria : 

Laborantsako geroaren beresküalatzeko, beren zerrenda presentatü düe Eüskal Herriko Laborarien Batarzünak eta Confédération Paysanne Biarnoa sindikatek igaran ürrietaren 10ean Beskoitzen. 23 laborari dira zerrendan eta haren bürüa, Mixel Erbin Nabarrenkoxe kantonamentüko Angouseko laboraria da. Zerrendan, departamentüko bi eskualdeak, laborantsako sail güziak bai ta gizon -emazteak ontsa ordezkatürik dira. Xiberotik bi gazteek parte hartüko düe. Muskildirik Maddi Gaztelusarry, eta Larraiñerik Nikolas Bengoetchea.  Laborari güzier deia lüzatü düe dagün urtarrilako Laborantsa Kanberako bozkeetan parte hartzeko saldo handian, "Laborantsa Herrikoi eta iraünkor" baten defenditzeko eta azken 30 urteetan beren politikarekin laborari hanitx desagerazi dütüen FDSEA sindikatako ardüradünen kanpo ezarteko.

Entzün Laurent Irigaray ELB sindikateko ordezkaria :