Xiberoko internet sarbide berri bat presentatürik izan da arramaiatz hontan Maulen. Herri Alkargoa, Turisma Bülegoa ala Odace alkartea, egitüra ezbardin horiek, algarrekilanko komünikazione baten plantatzeko gogoeta eraman düe. Azkenean, Internet güne berri bat sorarazi düe. Egitüra bakotxak züan günea eta helbidea desagertüko da urte ondarra gabe, « soule.xiberoa.fr » Xiberoa Herri Alkargoaren helbidean batürik egoiteko. Egitürek, alkarteek, enpresek edo edozoin herritar soilak parte hartzen ahalko düe günearen biziarazteko.

Entzün Adrien Béguerie Xiberoa Herri Alkargoako ordezkaria :

« Bidean » Bai Euskarari labela edo segürmarka esküratü dü Xiberoa Herri Alkargoak maiatz hontan Maulen. Ipar Eüskal-Herriko lehen Herri Alkargoa da ezagütageri hori bereganatzen düana. Herri Alkargoako haütetsüek ürrats horren inportantzia azpimarratü düe, ez « Bai Euskarari » alkarteari sogitez baizik, bena üngürüne osoari so egitez. Haatik, orano bidea lüze izanen dela, Herri Alkargoaren zerbütxü güzien eüskaraz emaiteko gei izan artino, gehitü düe eskentü düen prentsa aitzinekoan. Nahiküntea ez bada eskaz, hiztünak aldiz bai. "Bai Euskarari" Ziurtageriaren alkarteko Ihintza Aldanak bere aldetik baieztatü deikü Eüskararen ofizialtarzüna lagüntgarri izan daitekeala hürrünago joaiteko.

Entzün Allande Socarros Xiberoa Herri Alkargoako Eüskara Batzoredekoa :

Espainalatzeko baimena frantses jüztiziak eman ondoan, iragan abentüaz geroztik, Aurore Martin Batasunako militante politikoa gorderik da. Berriz agertzea erabaki dü eta ondorioer bürü egitea, erran nahi beita espainalatzeari. Honenbeste lagün, haütetsü edo sindikatetako militanteek beren gain hartü züen Aurore Martinen süstengatzea edo aterbetzea. Egoera politikoa kanbiatü da bere ustez eta beraz, bere gordeleküa utziko dü, bizitza publikoala ützültzeko. Bestalde, Euroaginteaz egünaldi berezi bat eginen da arramaiatzaren 18an neskenegünarekin Miarritzen.

Entzün Aurore Martin Batasunako militantea :

Estadoaren ordezkariak malgü agertü dira Departamentüko Aüzapezen biltzarrean Maulen. Lürralde antolaketaren xedeen kari, Herri Alkargoaren beregokitzea da lehen ürratsa. Xiberoak bat egiten jarraikiko dü, Eskiula ezik, eta Lixoze barnen sartüko da. Diru edo dotazioaren aldetik, ez lizate gütitzerik eta konpetentziak Herri Alkargoa bakotxa berak haüta lezazke. Azkenik, orai arte 3 mila eterdi bizizaleen hirietako ordezkariak bozkaz hautatürik baziren Herri Alkargoaetan izateko, proposamen berriak, hein hori 500 bizizaleen heineko hirietara ekar lezake. Ezagütza püblikoa düen Sindikatek ere desagert lirateke, Xiberoaren kasüan, Azenizamentüaren Sindikata. Hiru hilabeteko epea bada orai, aitzin dokumentü honi egokitzapenen ekarteko.

Entzün Dominika Boscq Xiberoa Herri Alkargoako lehendakaria :