Kirol günearen üngürüko lanak ürrentzen ari direlarik, Mauleko Herriko-Etxean arraberritze obrak abentüan hasiko direla, jakinarazi dü Herriko Kontseilüak « Mauleko Gütüna »-ren azken alean. Püblikoaren batzarria hobetü nahi da lan horien bidez. Segürtantxako normetan izateko ere hobekuntzak ekarriko dira eta informatika pikoan ezarriko da. Orotara, 300 000 euroko inbestizamentüa eginen da. Bestalde, Jai-Alaiko lanak bide honean direla baieztatü deikü Mixel Etxebest aüzapezak, sargiak eta aldagelak berritzen dira hor. Ondotik, trebatze zelaiak freskatüko eta argitüko dira. Rugby zelaiako jargien peko gelak arraberritüko dira, eta ahalmen ürriko jenteer batzarriaren egiteko behar diren lanak eginen dira. Orotarat, hiru urtez miliu bat iraganik euroko inbestizamentüa egin da kirol günean.

Entzün Mixel Etxebest Mauleko aüzapeza :

Batera Plataformak kanpaina berri bat hasten dü azaroa hontan ! 2010ko herri galtokaren ondotik, Batera plataformak orano ere Eüskal-Herriko lürralde kolektibitate baten xedea mahainaren gainen ezarri nahi dü. Azaroaren 18, 19 eta 20an, 15 foro antolatürik izanen dira Ipar Eüskal-Herri osoan, kargüdün politiko hanitx elestatüko dira beren ikusmoldearen emaiteko, lürralde erreforma berriaren mezperako memento hontan. Xiberoan ere, foro edo mahain üngürü bat antolatürik da azaroaren 19an, hontan parte hartüko düe Frédérique Espagnac senatür andereak, Jean Lassalle depütatüak, Xiberoko Kontseilü Orokorrak diren Arnaud Villeneuve eta Jean-Pierre Mirande, Herri Alkargoako lehendakaria den Dominika Boscq eta Allande Socarros Herri Alkargoako lehendakari ordariak. Hitzordüa emanik da Mauleko Zerbütxü günean, azaroaren 19ean arrestiriko 3 orenetan. Jenteek mahain üngüruan parte hartzen eta galto pausatzen ahalko düe. Prefosta, ororer zabalik da !

Entzün Frantxoa Camus eta Léonie Aguergaray Xiberoko Batera plataformako kideak :

"Lürraldeen Erreformaren" kari, Departamentüko Lürraldearen karta berria berriz ikusiko beita, "Eüskal-Herriko Haütetsien Biltzarrak" mozione bat bozkatü dü, Xiberoa, Lapurdi eta Baxenafarroa lotürik izan ditian karta berrian. Mixel Etxebest "Eüskal-Herriko Haütetsien Biltzarrako" lehendakari ordariak, galtoaren zergatiak agerazi dütü. Historikoki Eüskal-Herrian izateaz gain, EPFL, Eüskal Mendia, Osagarri edo Eüskara sailetan, sail zonbait baizik ez aipatzeko, Xiberoa, Lapurdi eta Baxenafarroak lan egiten düe, bena beti berex agertzen dira. Nahiz eta ez den jakinik noiz bürütüko den "Lürraldeen Erreforma", "Haütetsien Biltzarrak" bere ikusmoldearen agerazteko parada züan, hots hortaz baliatü dira sinpleki, erran deikü Mixel Etxebestek.

Entzün Mixel Etxebest "Eüskal-Herriko Haütetsien" lehendakari ordaria :

Commissions Syndicales edo Pireneetako Botingoako Federazioneko ordezkariek, herri eta Herri Alkargoaren ezagütze ükeitea aldarrikatü düe, Iratin azaroa hatsarrean egin düen bilküran. Nahiz eta beren eremüaren kudeatzea eta antolatzea osoki beren gain hartzen düen, ez düe herriek edo beste egitüra püblikoek dütüen lagüngoa züzenik. Lan talde bat osatüko düe, Bortüko haütetsüko alkartearekin, laborantsako partaideekin eta jüridiko aholkülari batekin, aterabideen atzamaiteko eta proposamenen egiteko. Botingoek esperantxa düe, Pireneetako Bortüko hazkuntzaren garapenarentako eramaiten ari den estüdio estrategikoan agertüko direla, estüdio hori izanen beita, 2013tik harat plantan ezarriko diren norabideen finkatzeko hoinak.

Entzün Jean-Pierre Mirande Xiberoko Botingoako lehendakaria :