Ihiztekako antxerrak eginen direia orano ondoko urteetan Xiberoan ? Ihizeko sasua doi doi hasirik, hona zer galtoa izan den, Xiberoko Botingoa edo Sindikataren biltzarraren ondotik. Hiru urte iraüten düen alokaidüak ürrentzen dira eta gütün bat igorririk izan zaie kabana eta lepoa alokaidatzen düener, jakiteko interesatürik düenez beren leküa begiratzeko ber prezioan, Botingoaren helbürüa delarik orai artinoko prezioaren etxekitzea. Sindikata arrapostüen haidürü da eta ageriko zer segida datean. Bestalde, püntü bat eginik izan da Iratin egiten diren obretaz eta ontsalas, obren parte handi bat 2012an ürrentüko da. Xiberoko Botingoa botzik agertzen da ere, bortü ezbardinetan eginik izan diren obretaz, hura helarazirik izan beita lekü frankotan eta olhetan ere obra handiak eginik izan beitira.

Entzün David Tourreuil Xiberoko Botingoako ardüradüna :

Mauleko komerzioaren etxekitzeko, herriko etxeak hartü zütüan neurri bereziak lüzatürik izan dira beste urte batentako. Erran behar da azken urteetan, komerzio zonbait etxebizitza bilakatü ziren Peko-arrüan bereziki eta horren ekürarazteko, etxebizitza horien jabeak, etxeen aitzinean auto aparkagiaren egitea behartzen dütü Herriko Etxeak, bestelan 10000 euroko karga pakatü behar dü. Delibero hori da lüzatürik izan beste urte batentako. Mixel Etxebest aüzapezak aitortü deikünaz, ez daki neurri horrengatik denez edo bestalde süstatü dütüen ürratsengatik bena urte batez, ez da beste saltegirik desagertü. A kontrari, janari saltegi bat zabaltü da berriki Peko- arrüan. Bide honean zirela eta sobera salatü gabe, laster beste lanbide berriak hartüko dütüela ondoko hilabeteetan gehitü deikü Mixel Etxebestek.

Entzün Mixel Etxebest Mauleko aüzapeza :

Düala 10 urte arrestatürik izan zen Didier Aguerre Pagolar preso politikoa. Aurten heinbat ekitaldi antolatürik dira, honen kari dagün setemerearen 24ean beren süstengüa ekarri nahi düen güziek, otobusez Lannemezaneko presondegiala joaiteko kümit dira. Eüskal-Herriak ezagützen düan egoera politiko berri hontan eta Didieren bizi pertsonalako gora-beherrek manatzen düelakoz, presoek sekülan beno haboro denen süstengüaren beharra badüe. Otobusa goizanko 9etan abiatüko da Donaixtiko plazatik arrestiriko 18etan ützültzeko. Leküak oraidanik etxekitzen ahal dira 06 75 68 06 79 telefona zenbakian. Ondotik kontzertü bat badate Bota gaztetxean, K.Way 731, Bizio, Ekintza eta Goienetxe anaiekin.

Entzün Manex Erdozaintzi-Etxart Didier Aguerre Süstengü batzordekoa :

Ez Baxenafarroan bezala, Lürraldeen erreformaren üngürüko eztabadak azpijokü politikarik gabe eraman dira Xiberoan. Hala izanik ere, prefetak proposatzen dütüan berantolaketak, mesfidantxak pizten dütü. Proposamenak diren bezala ez dütü honartü Xiberoa Herri alkargoak bere azken biltzarrean. Hur zikinen kudeatzeari bürüz, alkargoak sail hori bere gain hartzea ez dü honartzen, alde batetik, kanbiamenak ez badü hobetzerik ekarten eta bestetik, Estadoa lagüntza haboroen ekartea ez bada hitzartzen. Bestalde, eskolen alkargoak biltzen dütüan sindikata ezberdinen eskümenen hartzea ez dü honartzen ere, ez beitü nahi izan Estadoa eta Herrien arteko desadostarzünen arartekari edo epailerik. Azkenik, adostarzüna lortzen düan proposamen bakotxa da, Xiberoa Herri Alkargoan sartzeko Lixoze herriaren galtoa. Alkargoak esperantxa dü 2012ko urtarrilan sartzea bali datekeala.

Entzün Dominika Boscq Xiberoa Herri Alkargoako bürüa :