Xiberoko lehen libürüaren egüna iraganen da martxoaren 17an neskenegünarekin Maulen. Jean-Louis Davant, lehen edizione honen egüzaitak, Eüskal Literatüran pasealdi bat eskentüko deikü ostiralean 19.00etan Ondarrearen Etxean, ekimenaren estrenatzeko. Biharamenean parropiaren gelan, argitaletxeak, libürü saltegiak, libürü tratülantak, idazleak, erakus-mahainen gibelean izanen dira, beren eskentza edo libürüen erakusteko bai eta püblikoarekin mintzatzeko. Horrez gain, heben gaintiko idazle zonbaitek beren libürü berria presentatüko düe, mintzaldiak ere izanen dira, libürü irakurketak, eta atelierrak. Animazio güziek dohainik dirate eta egitarauaz argitarzün güziak esküalatzen ahal dira Mauleko hiriaren internet günean.

Entzün Julie Bercetche Mauleko hiriko kültür ardüradüna : 

XORA Peio Cachenaut-en lehen filma lüzea hedatüko da lehentze püblikoaren aitzinean martxoaren 10ean Maule-Baithan. Ixtoriak gei ezbardinak jorratzen dütü, lehen lerroan transmizioa eta ondarrea, kasü hontan arte sorkuntza sailetik ikusirik, baita ere lokarri hersi eta misteriotsü horik sorkuntza eta bürüjabetzaren artean. Azkenik ere, sortzailea eta bere obraren arteko harremanak… Maisü / ikasle harreman horren adierazgarri, Jef Goyhenexpe eta Ttittika Rekalt, bi aktür nausiek harreman ezbardinak dütüe eüskararekin : batak ama hizkuntza dü eta bestea aldiz eüskaldün berria da. Zinemak bere rola düke, transmizio honen lekükotarzüna izanez, pantailan literalki agertüko beita. XORA filma martxoaren 10ean neskenegünarekin gaüko 21etan Maule Baithan.

Entzün Peio Cachenaut Xora filmaren asmazalea : 

Filma berezia, bortitz, ausarta, historia opilotsü, aktür jokü hona, irudi eijerrak, soinü apaintze honak, holako oharrak entzün dira, martxoaren 10an XORA, Peio Cachenaut-en filmaren lehen hedapenaren elkitzean. Maule-Baitha zine gela bere 250 leküekin ttipiegi baratü da. 50 jente lekürik gabe egon dira eta so egileek apirila ondar artino egürüki beharko düe orai, filmaren ikusteko parada ükeiteko. Zine gela güzietan izateko banatzaile ofizial baten ükeitea beharrezkoa da. XORA filmaren egileek eta builtazaleek esperantxa düe maiatza gabe banatzailea edirenen düela.

Entzün lekükotarzün zonbait filmatik landa : 

Sohütan Hokin, Muskildi Urdinarben, Lexantzün, Barkoxen eta Gamere-Zihigan emanen dira autenko maskaradak. Barantailaz geroztik mustrakan ari dira Xiberoko ikastolako ikasle ohiak. Neskenegün oroz biltzen dira Maule Gaineko Etxahun gelan. Hor maskaradak osorik emanik dira gero taldeetan biltzen dira joküen lantzeko. Kargü nausietan Peio Bedecarrats date kabana, Pette Etxebarria Pitxu eta Xantiana Etxebest Buhame anderea. Mustrakak giro ederrean iragaiten dira eta hola emaiteko xedea düe herrietan. Maskaradak apirilaren 8ean emanik dirate Hokin, 15ean Muskildi Urdinarben, 22an Lexantzün, 29ean Barkoxen eta azkena maiatzaren 6an Gamere-Zihigan. Ikastolako ikasle ohiak izatez, haborokin bat eginen düe eta barrikadak eskentüko dütüe Herri Ürratsen maiatzaren 13an.

Entzün Maite Davant eta Xantiana Etxebest maskaradako bi arizale :