Xiberoan eüskaraz bizi diren alkarte zonbaitek eta herri alkargoaren eüskara batzordeak aküilatürik, Eüskaraz Bai dinamika aitzina doa. Bada urtea hasi zirela biltzen, gogozkatzeko hatsarrean, eta xiberotarrengana joaiteko ondotik. Enpresa eta saltegiengana hersatü dira hasteko, eta orotara 50 dira Eüskaraz Bai xedean sartzeko gogotsü agertü direnak.
Hortaz axolatzen den taldeak, bestalde, sos lagüngoa egin deio herri alkargoari. Arrapostüaren haidürü dira, eta sekülan nahi bezainbeste sos kausitzen balüe, langile bat hartüko lüküe ondoko ürratsen egiteko. Eüskaraz Bai bakoitxaren egoerari egokitzen beitzaio, langilearen gain litzateke sinatzaile güziengana joaitea hitzarmena enpresa edo saltegi bakoitxari egokitzeko.
Entzün Allande Errezarret :

Hebentik kolektiboak hilabetean behin gaüaldi bereziak antolatzen dütü bere egoitzan, Maulen. Aldi bakotx, Hebentikeko kide batek dü gaüaldia aurkezten, eta aldi hontan Angélique Fulin da antolatzailea. Pianista bat haütatü dü animazioaren ardatz gisa. Erik Satie pianista eta müsika sortzailea dateke beraz aipagei, eta bi ürratsetan. Batetik, neskenegün hontan (barantailaren 6) filma bat ikusgei dateke, ondotik Angélique Fulinek jarraikiko düalarik. Bigerren gaüaldia dagün astean izanen da, barantailaren 13an. Bi hitzordüak ülüntzeko 7etan dirateke.
Entzün Angélique Fulin :

Ebiarengatik baldintzak ez direlakoan betetzen, Mauleko ihauteak bihar izanen dira azkenean. Abiatzeko hitzordüa arrestiriko 2etan emanik da Mauleko zaharretxean. Arrestiriko 4.30tan haurrer arrestiri askaria eskeiniko zaie, eta Zanpantzarren auzia eta errearaztea Lextarreko plazan eginen dira arrestiriko 5.30tan.
Pitzgarrik parropia gelan antolatü aiharia aldiz gaur eginen da, Beninerat (Afrika) joanen diren sei gazteen bidajea pagatzeko. 13 eurotan izanen da eta izenen emaiteko zenbaki hontarat deitü behar da : 05 59 28 39 14.
Zinka ostatüak antolatzen düan kontzertüa gaur izanen da iragarri bezala. Tud taldea ariko da, Dut talde famatüaren kantoreekin. Taldeaz xehetarzünak heben klikatzez.
Entzün Maider Larrori, Pitzgarri alkarteko kidea :

Ostegün gaü hontan (barantailaren 4) Donapaleün, Argitxu Camus xiberotar ikerleak "Estatü Batüetako eüskaldünak eta eüskal nortarzüna" deitü düan mintzaldi bat emanen dü. Argitxu lüzaz egon da ipar Ameriketan eüskal etxe batetik bestealat, eta ünibertsitateko lanak ere badütü eginik gei horren üngürüan.
Alkarrizketatü dügülarik, Argitxuk anekdota batekin argi ützi deigü Estatü Batüetan bizi diren eüskaldün hanitx zoin kontserbadore izaten ahal diren (aipageiari zerbait ekarten deiolakoan idazten dügü hau). Artzainen omentzeko, 1989an Reno hirian (Nevada) Nestor Basterretxearen zizelketa edo eskültüra bat ezarririk izan zen (ezkerreko argazkia). Hanitxen gustüko ez zelakoan, ber hirian jatetxe bat düan eüskaldün batek beste omenaldi bat egin zeien artzainer (esküineko argazkia), bena hau tradizionalagoa.
Hortaz gain, Argitxu Camusen mintzaldian, nortarzün bikoitza aipagei izanen da, amerikar eta eüskaldün nortarzünak üztartzen beidütüe. Entzün Argitxu Camus :