Mobilizazioak jarraikitzen dü Frantses gobernüaren erretreten erreforma xedearen kontra. Asteazken goiz huntan berrehün bat jente alkarretaratü da Mauleko posta bülegoaren aitzinean, CGT, FO, Sud Solidaire, LAB sindikatek eta Sohüta eta Xanpo lizeoetako ikasleek deitürik. Posta, Edf Gdf, eta Mauleko Herriko Etxeko langileak, erakasle zonbait eta ikasleak nonbre handian biribilkatü dira. Louis Labadot mintzatü da CGTren izenean, postalarien ordezkari bat ere mintzatü da eta ikasleen izenean ere mintzatü da ikasle gazte bat. Azken hunek, gobernüaren gibelarazteko langile eta ikasleen arteko alkartarzüna beharrezkoa dela azpimarratü dü.
Xehetarzünak emaiten deizkü Laurentx Etxegoinek :

Hiri-erdian saltegien etxekitzeko neurri bereziak hartü dütü Mauleko Kontseilüak astelehen arratseko bilküran. Azken urteetan, komerzioak hiri-erdiaren bazterrean eraikirik izan direlakoz, erosle güttigo jiten da hiri-erdira erosketen egitera. Egoera honi bürüz, lehen lehenik, komerzio bat saltzen delarik, legeak baiesten düan bezala, Kontseilüak lehenspen edo preenpzione egiteko ahala baliatüko dü. Herriko Etxeak eremü bat  hirian finkatü dü , non ere lehenspen hori baliatüko düan, komerzio kopuru hon baten etxekitzeko hiri-erdian. Horrez gain, saltegi bat zerratzen delarik eta etxe bizitza bilakatzen bada, jabeak, saltegiaren aitzinean den aparkalekü bakotxeko 10 000 € ordaintü beharko dütü, jakitez orai artino 1500 €koa zela. Prezio goratze hau, urte batentako etxekirik date, Peko arrüan, Mauleko karrika komerzantenaren üngürüan eginen den ikerketaren emaitzak üken artino.

Entzün Michel Etchebest Mauleko aüzapeza :

Atzo Maulen, Kontseilüak, Xiberoko Herri Alkargoak, eta Xiberoan Eüskaraz Bai alkarteak, "Xiberoan Eüskaraz Bai" dinamika aurkeztü düe. Igaran urtean Herri Alkargoak gogoeta bat eraman züan eüskalgintzako alkarteekin eta "Eüskaraz Bai" kanpaina baten abiaraztea proposatü zen. Holaz, "Xiberoan Eüskaraz Bai" alkartea sortü da kanpainaren eramaile izanen den langilearen hartzeko xedearekin. Hebentik aitzina, alkarteko lagüntzaileek hasi züen lanaren jarraikia, Marie-José Thornaryk bere gain hartüko dü, "Xiberoan Eüskaraz Bai" alkarteko teknikalari berria. Teknikalariaren urteko lana date, "Xiberoan Eüskaraz Bai" akordioa jarraikitzea, jadanik izenpetü düen 50 saltegiek ondoko ürratsen eramaitea eta bakotxen ikustera joaitea. Ber lana eginen dü besta batzordeekin, bestetan Eüskara ageriago eta erabilago izateko gisan.

Entzün Allande Etxart Xiberoan Eüskaraz BAI alkarteko lehendakaria :

Auzibide ezbardinetan galdü ondoan, iragan üztailaren 27an departamentüko prefetak agintü düan bezala, Xiberoko Sindikatak, Iratiko etxoleen "saneamentü zentroa" berriz egin beharko dü. Setemer ondarreko obreen joanarazlea izentatü beharko dü, lanak 2011ko üztaila aitzin hasi beharko dira eta urte ondarreko ürrentürik izan. Bestalde, setemeraren 18ko biltzarrean jakinarazirik izan da, huraren sanotzeko lanak 6 olheetan eginen direla. Mikro filtrazio moldea haütatürik izan da eta obrek 8000 euro olhakal kosteko düe, sos lagüntzak ehüneko 70ekoak izanen direlarik. Azkenik, iragan ostiralean Ligin aurkeztürik izan den Xiberoko bortüaz inkestaren emaitzen segida emanik date. Horrengatik, Xiberoko Sindikatak bilkürak eskualdeka antolatzen dütü : Maltan setemeraren 30an, Igelun ürrietaren 7an, Iratipean ürrietaren 14an, Iratigainean ürrietaren 21an, Ahüzkin ürrietaren 28an eta Bostmendietan azaroaren 4an.

Entzün Pepela Mirande Xiberoko Sindikateko lehendakaria :