Transhümantziako bidearen xerka ibili dira Mixel Etxekopar eta François Rossé soinüegileak berriki plazaratü den Transhumantzia dizka berrian. Pianoa, txülüla, tzintzarriak, poesia, müsika esperimentala, txori erots eta hitzak, Mixel Etxekoparenak haboroxenak, Josean Artzearen bat eta herrikoiak ere, horik oro bildü dütüe bi artistek, Elkar dizketxearen estüdioetan grabatürik izan den obra hontan. Transhümantzia dizkak, hatsarrean algarrenganik ürrün üdüritzen diren bi mündü biltzen dütü, alde batetik heben aurkeztü behar ez den Mixel Etxekoparena eta bestetik, François Rossé piano joile eskü ausartarena. Müsika tradizionala ala garaikideren artean haütatzeko ordez, ohidüra garaikidearen ildoa jorratzen düe azkenean. Mixel Etxekopar aitortü deikünaz bertsolariek egiten düen maneran inprobisazioan bermatzen da beren müsika, grabaketa egin aitzinetik ez beitzüen deüs ere idatzirik izan.

Entzün Mixel Etxekopar müsika egilea :

Jean Baptiste Coyos eüskalzain osoa izentatürik izan da ostirale goizan Bilbon egin den osoko biltzarrean. Jean Louis Davant eüskalzain emeritü izaitearen ondorioz sortütako hütsünea betatzeko bozketa egin dü Eüskaltzaindiak. Jean Baptiste Coyos botzik agertü zaikü bere izentatzeaz. Eüskaltzaindian Xiberoa ordezkatüko dü eta ondoko hilabeteetan xiberoko eüskaltzale eta eüskara sailean aditüak direnekin biltzeko asmoa dü. Jean Baptiste Coyos Etxebarne 1952an sortü zen, Maulen. 1974an lehen mailako irakasle ikasketak bürütü zütüan eta geroztik irakaslea izan zen 2008 artino. Hizkuntzalaritza Orokorreko doktorea da, 1998an, René Descartes ünibertsitatean "Arbailletako xiberotar mintzairaren deskribapena-Ergatiboaren estüdioa" izeneko tesiarekin. 1996az geroztik eskola ematen dü ünibertsitateetan. 1999tik 2003ala hizkuntza politikarako kargüdüna izan zen Pirinio Atlantikoetako Konseilü Orokorrean eta ikerketa kargüdüna Baionako Iker zentroan, 2004etik 2006ala. 2006an eüskalzain urgazle izentatü züan Eüskaltzaindiak. Akademiaren Süstapen batzordeko kidea da.

Entzün Jean Baptiste Coyos eüskaltzaina osoa :

Hogeita hamar bat urtez borrokan aritzez eta politika sailean lan egitez, Iparretarrak (IK) erakundeak gisa hanitxez parte hartü dü gaüzen aitzinarazten, herritarren ikusteko manerak kanbiarazten eta jenteen gogoa pizten eta hazten, Ipar Eüskal Herrian. Bühürtzera behartze hori eta herria bai Herritarren defenditzeko nahikünte hura “Herriak bizi behar dü” erranaldian oso-osorik agertzen da. 2007eko abentüan, eüskaraz, eta 2010eko apirilan frantsesez agertü den Eneko Bidegain kasetalariaren “Iparretarrak, erakunde politiko armatu baten historia” libürüak borroka urte gogor horien berri emaiten dü, honenbeste militanteren jakilegoarekila. IKko kide horietarik biga, Xan Ansalas eta Allande Socarros, borroka urte horien aipatzera jinen dira Mauleko Zinka ostatüala, abentüaren 3 hontan, arratseko 20:30tan.

Entzün Eneko Bidegain Iparretarrak libürüaren idazlea :

« Olaz ola ikas » ikusgarri berria eskentüko düe Xiberoko Ikastoletako Ikasle Ohiek abentüaren 11an Mauleko Jai-Alaian. Bada aste andana bat orai, Zibozeko sabaian biltzen direla, berek sortütako dantza, kantore eta antzezlanen pikoan ezarteko. Taula joküaz kanpo, beste ikasle zonbait karraskan ari dira : antolatzean, apainketa lanetan, sos lagüntzak biltzen, bai eta ikusgarrian parte hartzen ez düen ikasle ohien biltzen eskükaldi bat eman dezen. Ikusgarri hontan, Xiberoko Ikastolen sortzetik gaurkoalako ibilbidea kontatzen da ikasleen ikuspüntütik. « Olhaz olha ikas » ikusgarria Xiberoko Ikastoletako Ikasle Ohiek düe osoki antolatzen. XIIO alkartea sortü zen 2010eko urte hatsarrean bi helbürüekin, lehena Xiberoko ikastoletako ikasle ohien biltzea, honen karri 180ek harremanak berpiztü dütüe eta bigerrena ikusgarri honen plantatzea.

Entzün Ihitz Iriart kantore eramailea :