ESAIT (Eüskal Selekzio baten Aldeko Iritzi Taldea) eta SAMeko pirripita (bizikleta) taldeak berriz ere jüntatü dira Irati Tourraren prestatzeko. Iragan urteko arrakasta ikusirik, aurten bi egünetara lüzatü düe pirripita ibilaldia. Berrikuntza hortaz gain, formüla ez kanbiatzen : bi ibilbide, bata bestea beno aisagoa, eta lehiaketa nahi düenentako baizik eta kilometra gütietan.
Üztailaren 3an, Mauletik abiatüko dira ziklistak Maulerat ützültzeko, eta artean kronometratürik datekean parte bat egitez (nahi düanak erran bezala) Mendibe, Behorlegi eta Aphanizen gainti. Zonbaitek 100 kilometra eginen dütüe, besteek 64. Biharamünean, hor ere Mauletik Maulerat, bena Larraine eta Bagargi zeharkatzez (kronometratürik izateko paradarekin), Burdinkurutzetatik eta Gamiatik iragaitez.
Erran behar da Irati Tourran lasterketa puxka zonbait badira ere, ibilbide kronometratüak ürrentü ondoan, taldeak berriz bat eginen düala, lehenek azkenak egükitzez, denak ber denboran heltzeko gisan. Izenaren emaiteko edo ibilbideak hobeki ezagützeko ikus web güne hau : www.iratikotourra.com.
Entzün SAMeko Jean-Claude Ager :

Karkailak haurrentako antolatzen düan ondoko hitzordüa astelehenean (abentüaren 21ean) izanen da Kemen alkarteko Jose Perezekin. Pagolan bizi den gizon horrek arte martzialak erakasten dütü, eta eüskaraz. Egitaraua adinaren arabera antolatürik izanen da Mauleko karate gelan : 
3 eta 6 urte artekoak goizanko 10.30tarik egüerditara
7 eta 13 urte artean arrestiriko 2.30tarik 4.30tara
Aldi oroz bi talde izanen dira, adinen arabera eta parte hartzea 3 eurokoa.
Izenen emaiteko deit : 05 59 28 28 25 edo 05 59 19 17 59
Entzün Maider Sarasola :

Rügbia ez da gizonen afera. Azken urteetan, Neska gaitzek ontsa erakutsi düe beren balioa Mendikotako rügbi zelaian. Hatsarrea gaitza izan bazen, trebatzeko denbora hartü düe, taldea handitü, eta orai kausitzen dütüen emaitzak ez dira ahalkegarriak. Bena Mendikotako neskatilen rügbi taldea ez da kirol emaitzetara mügatzen. Gizon talde haboroenek ez bezala, beren gastü ezberdinen pagatzeko berek dütüe sos ütürriak atzamaiten. Iragan urtean hasi ziren, eta aurten ere egütegi bat saltzen ari dira. Iragan urtean erri egingarria nahi izan züen egin, aurten berriz -ikus argazkia- feminitatea agerrarazi nahi izan düela erran deigüe. Entzün Christelle Harislur, taldeko kidea :

Bortükariak alkartearen biltzar nagusian, bi aipagei nagusitü dira : ola arraberritze eta 30 urteen ospakizüna. Halere lehenik aipatü behar da ikasurteko (ürrietatik ürrietala) bilana egitean, aurten elkaldi hanitx ezeztatü behar izan dütüela aro txarrarengatik.
Bena erran bezala, aipagei nagusiak besteak ziren. Alkarteak jadanik egin züan bezala, nahi lütüzke berriz ere ola zonbait arraberritü. Bat beno haboro nahi lütüzküe beraz berritü, eta zerrendan lehena Oladübi. Bena sos biltzea lan gaitza izanen da, alkarteko Allande Sokarrosek erran deigünaz :