Üdako Xiberoko kültür hitzordü nausia, Pierra Lhande pastorala gero eta hüilanago dügü. Arizaleak trebatzen dira aste oroz eta antolazaileak lanean karraskan ari dira dena pikuan izan dadin üztailaren 26eko. Anartean, komünikazioa ere ontsa lantzen ari dira, lehen lehenik "http://pierralhande-pastorala.com/" internet günearen bidez, eta afitxa ere plazaratürik izan da düala aste zonbait. Aurten ez da afitxa lehiakarik antolatürik izan, eta konfiantxa egin düe Mattin Partarrieu-ri. Pierre Lhande pastorala, üztailaren 26an eta agorrilaren 2an emanen da Zalgizen.
Mattin Partarrieu :

Eüskal Herriko Haur kantü txapelketako finalean, Xiberoa ordezkatüko düan ordezkaritza haütatürik izan da, iragan neskenegünean Urdiñarben egin zen kanporaketan. Haurtxoen kategorian, biazka Altzaiko Marie eta Kattin Urruty ahizpak, eta taldeka Basabürüko Ikastolako hirugerren zikloko ikasleak. Gaztetxoen kategorian bakarka, Sohütako Léa Escondeur, eta Urdiñarbeko Johañe Berogain. Kantari gazte horiek, dagün arramaiatzaren 13an Bilbon iraganen den finalean parte hartüko düe. Beste sari zonbait ere emanik izan dira, hara nola, haurtxoen kategorian, bakarka Müskildiko Aña Caset-eri lehen saria, bigarren saria Altzaiko Katti Garikoitz-eri, biazka bigerren saria Mauleko Argitxu Claverie eta Anita Elkegaray-eri. Gaztetxoen kategorian taldeka lehen saria Müskildiko taldeari (Clara eta Elisa Borthayre, Maialen Urrutiaguer, Aña Caset eta Maiana Uhalt) eta bigarrena Larraineko eskolari, bakarka bigerren saria Urdiñarbeko Johañe Berogain-eri. Sorkuntza saria Sohütako Eperra ikastolari emanik izan da eta püblikoarena Léa Escondeur-eri. Arraska ederra üken dü 2015eko HKT-ko Xiberoko kanporaketak, püblikoa nonbre haundia hüilantü zen eta ez da düdarik bihar ere kantari ederrak badiratekeala Xiberoan.
HKTxapelketaz Maite Lephaillek egin erreportaia :

Irakurri gehiago ...

Maider eta Jean Mixel Bedaxagar, Niko Etxart, Jean Bordaxar, Mikel Markez eta Eloise Durant, Eüskal kantoreaz aditüak direnak bildü zütüan Urdiñarbeko Bil Xokoa alkarteak iragan neskenegünean, Müsikaren Egünaren karietara egin zen mahainaren üngürüan. Düala ehün urte, Alemanian preso ziren Eüskaldün zonbait eman züen kantoreen grabaketak, nola bildü dütüan esplikatü züan Maider Bedaxagar-ek. Jean Mixel bere aitak aldiz, Sû Azia alkarteak eraman düan kantore zaharren bilketaz mintzatü zen. Niko Etxart-ek, kantatzeko leheneko maneratik  gaurko moldeala zer bide egiten den zehaztü züan ikuspüntü personalatik abiatürik. Jean Bordaxar-ek kantorearen leküaz pastoraletan eta Mikel Markez-ek kantorea eta militantismoa jorratü züan. Azkenik Eloise Durant ikerlariak, emazteen leküaz kantagintzan egin düan ikerlanaren berri eman züan. Bi oren iraunten düan mintzaldi interesgarri horren entzüteko parada eskeintzen deizüegü orai :

Berehün bat haur eta gazteek parte hartüko düe Eüskal Herriko Haur Kantü txapelketako Xiberoko kanporaketan. Kantaldia neskenegün hontan arrestiriko 15:00etan iraganen da Urdiñarben Müsikaren Egüna kültür ekimenaren baitan. Parte hartzearen aldetik arrakasta ez da aphaltzen, hogei ta hamasei kantore emanen dira, iragan aldian beno hamar haboro. A Capella emanen dira kantore haborosenak Xiberoan ohi den bezala, bi kantore baizik ez beidirate musika tresnaz lagüntürik.
Artzen Letona antolatzailea :