« Beste familia güziak bezala, gure familia eta haurren hezteko züzena eskatzen dügü, besterik ez », hona zoin mezüekin Maulerat jin diren « Les Bascos », Ipar Eüskal Herriko gay eta lesbiena alkarteko kideak. Bikote kide baten heriotzak, bere bizilagüna deüserekin üzten ahal lüke, ondorioz, ezkontzeko züzena galtatzen düe. Adopzioa dela eta, argi ützi düe ez düela nihori haurrik hartü nahi. Jadanik dütüen haurren zaintzea baizik, ez düe nahi bermatü lege baten bidez. Bestalde, Eliza katolikoaren adar gogorrenak eramaiten düan kanpaina salatü nahi izan düe, erranez "Jesüs kristoren maitarzünezko mezütik hürrün direla eta balore morala zaharkitüak, berriz nahi dütüela bideratü jentartealat, lotsaren tzarpa harroaraziz".

Entzün Beñat Gachen "Los Bascos" alkartekoa : 

Palestinako lürretan, Israel-ko kolonietan egiten diren ekoizpenen boikota kanpainaren berri emaiteko, Xiberoko saltegi handi batean ekintza bürütü düe "BDS"kolektiboko heinbat militanteek. Frütü jüsak, abokatak, edo ñeñeentako oihalak bezalako ekoizpenak, kaddi batetan bildü eta alanbrez üngüratü dütüe, eskü paperen banatzea egin düe palestindarren egoeraren ezagütarazteko. Veolia bezalako enpresen joka moldea ere salatü düe. Enpresa honek, garaio zerbütxüak eta ondarkinen biltzeko sareak garatzen dütü Israel-ko kolonietan. "BDS edo Boycott Désinvestissement Sanctions" kolektiboak, Xiberoko Herri Alkargoak Veolia enpresarekin düan kontratüaren ez arraberritzea galdegiten dü.

Enzün Hubert Catalogne BDSko kidea : 

Xiberoan edaten den huraz, Kontseilü Orokarrak eginarazi düan inkestaren emaitzak jakinarazi dütü, SAEP Xiberoko Hur sindikataren azken jüntan. Segürtantxaren hobetzea, huraren ekoizteko ahal teknikoak eta teknikalarien ahalak botitzea agertzen dira inkesta hortan. Azkenik, huraren egiazko prezioala heltzea da helbürüa, ororen bürü Sindikat ala Regie delako bat bera egitez. Helbürü horietara nekez heltüko da, Xiberoan diren 14 sindikat ala regie ezbardinek ez beitüe bat egiten, hur kudeantza bakar baten ideiarekin, bakotxak huraren prezio aphala etxeki nahi beitü bere eremüan.

Entzün SAEP Hur Sindikateko lehendakaria Alain Brousset-Matheu :

2012ko azken kontseilüa egin da Mauleko Herriko-Etxean. Aipagei nausietan izan da, hiri-erdiko etxe aitzineen arrafreskatze xedea, 20 000 euroko büdjeta bozkatü da hortarako. Bestalde, urte hontan aipatzen den "Haize errota" edo "Parc Eolien" delako proiektüan, azkenean ürrats bat eginen da eta errota bat ezariko da ikusteko aski haize badenez. Urteko azken biltzarra izanez, urteko bildüma egin dü Michel Etxebest aüzapezak, erakustez obra hanitx eginik izan direla azken 3 urteetan. Orai lan haboroxenak ürrentürik, 2013ko xede nausia izanen da espartiñaren etxea altxatzea Maulen, tresna turistikoa eta ekonomikoa izan nahi da. Azkenik, urte ondarreko agiantzak eginen dira urtarilaren 4ean arratseko 19.00tan.